(Mantuto) Mudansa – Xefe Sentru Saude Postu Administrativu Laclo Munisipiu Manatutu, Domingos Guerra Castro informa, Ekipa Saude halo Advokasia no kampaña integradu hodi fahe informasaun ba autoridade lokál sira oinsá atu hadook komunidade husi moras aat sira hanesan Tensaun Ram Midar TBC no Dengeu.
“Aktividade ohin, ita fahe informasaun ba Autoriadade lokál sira depois kontinua tranzmite informasaun ne’e ba komunidade sira oinsá atu hadook an husi moras hanesan ha’u temi iha leten,” Dehan Xefe Domingos ba jornalista Média Mudansa iha salaun Administrasaun Postu Laclo Manatutu, Kuarta 29/11/2023.
Nia afirma, objetivu enkontru ida ne’ebé fahe informasaun ba nia na’in ulun sira hodi bele iha koñesimentu hodi tranzmite di’ak liu tan informasaun ba iha komunidade sira.
“Aktividade ne’e iha parte tolu, ida, ita halo advokasia nivel postu akumula de’it lider komunitáriu depois seluk ita halo asaun integradu ba iha komunidade no mós terseiru mak eventu kalan iha komunidade ne’ebé hela iha área remotas tanba durante ne’e la iha fasilidade saúde nian,” Nia deklara.
Entretantu iha atividade kampaña integradu ne’e marka prezensa husi Xefe sentru saúde Laclo ho nia estrutura, komunidade, Xefe Suku, Xefe Aldeia sira no mós hetan seguransa husi Polisia Nasional Timor-Leste (PNTL) Postu Administrativu Laclo Munisipiu Manatutu.
Jornalista : Gaudencia Belo
Editór : Orlando Magno
