(Dili) Mudansa – relasiona ho eleisaun suku ba segundu ronde ne’ebé sei akontese iha 13 novembru 2023 Eskola Sekundária Geral (ESG) 10 de Dezembro Comoro Dili fó toleránsia ba estudante sira hodi ba ezerse sira nia direitu ba lideransa ne’ebé sira fó fiar iha períodu tinan 7 nia laran .
Diretór ESG.10 de Dezembro Comoro Dili Martinho S. Corsino informa, to’o agora eskola refere seidauk simu orientasaun husi ministériu edukasaun hodi fó feriadu ba estudante sira atu ba ezerse sira nia direitu hodi vota ba lideransa suku iha períodu 2023 to’o 2030 iha kada suku.
“To’o agora ami seidauk iha orientasaun husi Ministériu Edukasaun atu fó feriadu ba estudante sira hodi ba ba ezerse sira nia direitu hodi vota ,Maibe hanesan devér ida fó toleránsia ba estudante tanba sira mós iha direitu ba vota “,dehan diretór Martinho ba jornalista média mudansa iha ESG 10 Dezembro Comoro Dili 8/11/2023
Nia haktuir, molok atu fó feriadu ba estudante sira ministériu edukasaun tenke hatuun despaixu ruma bazeia ba katak feriadu maibé kuandu laiha despaixu ruma husu ministériu edukasaun eskola la fó feriadu ba estudante sira maibé fó de’it toleránsia ba estudante hodi ba vota.
“Se ita la fó toleránsia ba estudante sira hodi ba ezerse sira nia direitu signifika ita viola sira ninia direitu tanba programa ne’e governu nian ha’u-nia sujestaun mak ne’e se bele Ministériu Estatál ho ministériu edukasaun tenke servisu hamutuk hodi bele difikulta profesór no estudante sira ne’ebé atu ba tuir eleisaun ida ne’e ,”katak nia.
Nia akresenta ,molok fó toleránsia ba estudante sira hodi ba vota bazeia ba distánsia entre Dili no munisípiu se estudante sira husi munisípiu Aileu ,Likisa Manatutu sira ne’e sei tama fali eskola iha 14 loraik hanesan baibain mak estudante sira husi munisípiu Vikeke Suai ita tenke aumenta tanba dook to ‘o dia 15 sira bele tama fali eskola hodi tuir prosesu aprendizajen hanesan baibain.
“Ita boot sira iha direitu atu fó votus ba se mak ita boot sira fó fiar ba hodi bele garante ukun ita ho di’ak maibé keta haluhan katak ita boot sira nia futuru mós importante tebes, no ezame mós besik ona nu’udar joven ida kuidadu ita-nia an nune’e ita bele fó laran metin ba inan aman katak ha’u-nia oan depois vota hotu fila mai eskola ho di’ak,” nia hakotu
Jornalista : Domingas Viana
Editor : Orlando Magno
