(Dili) Mudansa– Diretor Haburas Dezenvolve Talentu (HADESTA) Francisco de Araujo informa, 5 Outubru mak loron internasionál ba professores tanba sira mak matadalan ba dezenvolvimentu se la iha professores la iha dezenvolvimentu maibé eskola iha Timor-Leste la iha kualidade ba estudante sira.
Nia hateten kontribuisaun professores nia bo’ot liu ba rai ne’e tanba atu dezenvolve nasaun presiza professores nia matenek atu fahe ba estudante no jerasaun sira se la iha professores labele halo buat ruma no hakarak sai Ministru ka Deputado presiza professores nia matenek.
“Ita hatene Governu iha Eskola Tekniku profisionál, eskola sekundária jerál maibé durante ne’e eskola no nivel estudu iha Timor-Leste ne’e la iha kualidade, tanba durante ne’e iha eskola barak la iha eskola ekipamentu ne’ebé bele ajuda sira hanesan laboratóriu, biblioteka no mós fatin prátika sira tanba la iha kontribuisaun husi Governu atu ajuda sira,” Dehan Diretor HADESTA Francisco ba jornalista iha HADESTA Dili Quinta ne’e, (5/10/2023)
Diretór Francisco relata, Hakarak dezenvolve rai ne’e ajuda ida mak kria biblioteka fatin prátika no mós fasilita ba profesór sira tanba durante ne’e profesór Timor laran tomak barak mak voluntáriu la iha orsamentu atu sustenta família.
“Loron kalan mak voluntáriu hela de’it hanesan ne’e, ita labele garantia buat ida kualidade tanba profesór sira hakarak fó kualidade ba estudante maibé nesesidade ne’ebé presiza la iha tanba ne’e Ministeiru Edukasaun (ME), labele rekrutamentu voluntáriu maibé presiza rekrutamentu permanente hodi fó kualidade eskola iha Timor laran tomak,” Nia relata
Diretór HADESTA Hateten, dala barak eskola balun akumula estudante to’o 50 ou 60 Ida ne’e la garantia kualidade eskola, nia hakarak ba futuru ne’e kada eskola atu kualidade ne’e aula ida 25 ou 30 hodi garantia kualidade aula Ida professores na’in rua atende estudante sira.
Atu dezenvolve rai ne’e ho di’ak tanba Timor-Leste fasil tebes ba iha edukasaun hakarak ba futuru ne’e ME tenke tau konsiderasaun ba ida ne’e.
Reprezentante professores Vonlutariu Agustinho Soares de Araujo hato’o parabéns ba professores tomak iha Timor-Leste no mós iha mundu tanba loron ida ne’e importante ba manorin na’in sira hotu.
“Ha’u atu dehan manorin nain mak eroi daruak ba ita-nia eroi tuan sira ne’ebé luta no sakrifika sira nia an ohin ita hakerek ita-nia istória ho naran Republika Demokratika Timor-Leste no Se mak lori naran lulik Ida ne’e atu dezenvolve iha rai ki’ik ida ne’e mak manorin na’in sira,” Dehan Professores Volontariu
Tanba ne’e reprezentante professores voluntáriu hotu-hotu voluntáriu kontratadu no permanente hakarak agradese i fo onra ba eroi sira no mós professores balun ne’ebé uluk sai mós luta hasoru invasaun sira ohin Timor bele restaura nia independénsia bele hamriik hanesan nasaun ida iha rai ne’e.
“Rekomenda ba ME problema edukasaun sai preokupasaun ba ema hotu nia problema barak tinan 20 ona sosiedade hotu preokupa ba kualidade edukasaun, pontu importante Ida hakarak husu ME bele tau konsiderasaun Infrastrutura, Rekursu umanu, Fasilidade no Kurikulum problema haat ne’e kuaze ema hotu ko’alia,” Nia Informa
Nune’e mós Professores Vonlutariu Agustinho husu tulun liu husi governu ME hotu-hotu tenke tau hanoin hamutuk konsentra ba edukasaun tanba edukasaun mak huun ba dezenvolvimentu liu husi manorin na’in sira.
Jornalista : Gaudencia Belo
Editór : Orlando Magno
