(Dili) Mudansa– Imelda Freitas hanesan Negosiante ida ne’ebé mak hamahan an iha Merkadu Taibesi durante tinan lima nia laran hodi buka moris liu husi fa’an produtu lokál, maski la folin maibé hamnasa no mós nunka lakon esperansa.
Iha entrevista entre Jornalista Media Mudansa ho Negosiante Imelda Freitas informa, durante nia halo Negosiu produtu lokál
iha merkadu Taibesi depende ba tempu di’ak ema sosa barak maibé dala barak liu soe estraga de’it tanba ema la sosa to’o modo namlaik no dodok de’it
Nia dehan,maski hasoru dezafiu sira hanesan ne’e, maibé nafatin kontinua fa’an tanba de’it ekonomia uma laran no mós atu sustenta oan sira nia estudu.
“Durante ami fa’an sasán sira ne’e di’ak ida ema mai sosa maibé tempu ida ema la sosa, to’o modo no ai-fuan sira ne’e dodok hotu, maski nune’e ha’u nafatin kontente no pasénsia hodi hein ksolok loron aban nian,” Dehan negosiante Imelda Freitas ba jornalista Media Mudansa iha merkadu Taibessi, Dili Kuarta,(28/09/2023)
Nia haktuir, iha mós dezafiu balu mak hanesan loron manas, anin no Guarda Munisipiu Dili sira mai duni no foti sasán maibé Emilia la fó sala ba ema tanba ida ne’e orientasaun servisu tenke halo tuir sira nia regras
Negosiante ne’e mós hato’o nia sentimentu triste tanba tuur iha laran ema ladún hola no lori sai mai tuur iha li’ur mós la folin entaun sasán sira ne’e dodok no soe de’it ba lixu fatin (Sampah)
“Ami hola tau fali hanesan ami nia maluk ba hola iha foho lori mai fó ami fa’an fali iha ne’e, ha’u fa’an iha ne’e durante to’o ona tinan 5, tan de’it atu sustenta ha’u-nia oan inan-aman no família Uma laran,”Tenik nia
Enkuantu, sasán ne’ebé negosiante Imelda fa’an ne’e sosa tutan husi ema mak hanesan, Baria raga ida $.25.00 dolar fa’an fila tau iha Balde ki’ik $2.00 dolar no Balde boot $.5.00, ai-manas kuncimas ida sosa ho $25.00 dolar fa’an fali bikan ki’ik ida $0.50 sentavu ou $1.00 dolar,Koto,Batar,Fehuk no Pipinu
Nia konta uluk 2018 to’o 2019 sira sente di’ak tanba ema tama hola loron ida hetan $50.00 $60.00 dolar maibé diferente ho agora kada loron ladún hetan rendimentu di’ak tanba loron ida hetan de’it $20.00 ou $30.00 dolar
Negosiante Imelda Freitas husu maluk no kolega sira hotu hakarak duni atu fa’an sasán sira ne’e bele mai tanba merkadu ne’e estadu halo ba ema hotu atu mai buka moris hodi sustenta família uma laran la’ós merkadu ba ema ida de’it nian.
Jornalista : Gaudencia Belo
Editór : Orlando Magno
