(Dili) Mudansa – Orsamentu Ratifikativu (OR) ne’ebé Governu prepara hela hodi lori ba Parlamentu Nasionál (PN), Primeiru Ministru (PM) Kai Rala Xanana Gusmão sei ajusta didi’ak hafoin bele aprezenta.
Primeiru Ministru (PM) Kai Rala Xanana Gusmão informa, ohin enkontru semenál relata atividade kona-ba Orsamentu Ratifikativu (OR), ne’ebé ohin mai informa ba Prezidente Repúblika maibé agora ajusta buat sira ne’e hotu nune’e semana oin bele lori ona ba Parlamentu Nasionál (PN).
“Uluk ita nia orsamentu sira ne’e iha kategoria maka, saláriu vensimentu, bens serbisu, kapitál mellora, vensimentu públika, maibé ikus ne’e, programa, sub-programa, husi ne’e maka ami atu lori OR ba PN, ami tenke ajusta didi’ak,” Primeiru Ministru (PM) Kai Rala Xanana Gusmão dehan ba Jornalista sira hafoin enkontru semenál ho PR José Ramos-Horta iha Palásiu Prezidensiál, Bairo-Pite, Kinta 03/08/2023.
Xefe Governu afirma, kona-ba dadus nia (Xanana) la bele temi sai, tanba iha enkontru semenál ho Xefe Estadu mós la temi sai, nune’e ho sentidu katak, karik fó ho sentidu balu seidauk loos, ne’e duni PM Xanana la dehan sai ba públiku.
Nia realsa tan, parte Governu sei prepara no depois semana mai ne’e bele haruka ba PN, hodi diskute iha ne’ebá maka sei haree ba organíka foun ba Governate ida-idak, tanba iha mudansa uitoan.
“Depois maka komesa ona atu halo alterasaun ba lei ruma ne’ebé ami iha, ho ida ne’e hotu maka tama ona ba planu preparasaun Planu Anuál ba tinan 2024, tanba iha iha tinan 2024 hakarak atu halo saida, tau osan hira hodi ita sukat didi’ak kbiit atu tau osan ne’e, tanba ne’e osan estadu nian, osan povu nian, nune’e ita tenke halo uluk planu,” PM Xanana relata.
Iha enkontru ne’e, Prezidente Repúblika (PR), José Ramos-Horta mensajen ba Primeiru Ministru (PM), Xanana Gusmão katak, kuidadu, defende osan povu nian, kontinua serbisu tanba povu hili ita la’ós atu sai Primeiru Ministru (Liu rai) maibé atu serbisu.
Jornalista: Mariano Do Santos Abi
Editor : Orlando Magno
