(Dili) Mudansa – Transporte marítima Berlin RAMELAU daudaun ne’e la hala’o movimentu ba Rejiaun Administrativu Espesiál Oekusi Ambenu (RAEOA), tanba problema ekipamentu modernu no intervensaun polítika inklui menus koñesimentu atu halo operasaun.
“Ita-nia problema maka Ro ne’e mais modernu ita-nia rekursu umanu atu halo operasionais ba Ro ne’e sei menus koñesimentu tanba Ro refere fornese husi Governu Xina ho ninia ekipamentu mais modernu,” dehan Visse Reitor III Universidade Dili (UNDIL), Hugo Lourenço ba jornalista iha Portu Dili, Segunda 31/07/2023.
Hugo haktuir, Antes ne’e Timoroan ida maka lori ró maibé intervensaun polítika iha Governu anteriór, entaun hasai tiha Timoroan ne’e, maski iha esperiénsia kuaze tinan 10 resin iha estranjeiru.
“Ha’u pesoalmente koñese di’ak kapitaun ne’e naran Maurico ne’ebé lori Ro Tanki, depois nia serbisu tiha iha ne’e, tanba iha dezentendimentu uitoan entaun ita la uza, depois fó fali ema seluk maibé atu lori Ro tenke hasai kursu la’ós formasaun de’it dehan bele lori Ro,” Hugo afirma.
Nia sujere, husu IX Governu konstitusionál atu haree fali asuntu ne’e hodi bele la’o di’ak, tanba Ro ne’e soke dala barak ona, serake Timor nia rekursu umanu atu manda Ro de’it mós la iha, tanba polítika mak domina liu, espera katak, ba oin sei la mosu tan situasaun hanesan ne’e.
“Ha’u fiar katak, Governu ida ne’e sei di’ak no susesu, importante maka tau ema ne’ebé profisionais hodi hala’o serbisu, la uza motivasaun polítika, espera Governasaun IX bele hadi’a irregularidade ne’ebé mosu iha parte Transportemarítima,” nia hakotu.
Jornalista : Mariano Do Santos Abi
Editór : Orlando Magno
