(Manatuto) Mudansa – Prezidente Repúblika (PR), José Ramos-Horta, Sexta 28/07/2023 ne’e, entrega uma meia-parede inklui kioske no fahi-luhan, ne’ebé konstrui hosi Prezidénsia Repúblika liu husi Servisu Sosiedade Sivíl no Apoiu Sosiál (SSAS-PR) ba inan faluk Modesta Soares, iha Aldeia Torilalan, Suku Orlalan, Postu-Administrativu Laklubar, Munisípiu Manatuto.
Tuir nota imprensa ne’ebé Média Mudansa asesu hanesan, ho identifikasaun ba kondisaun moris husi benefisiária ne’e, halo direta hosi Xefe Estadu Ramos-Horta bainhira hala’o viajen ba Laklubar.
Iha dalan ninin, Prezidente Horta hateke ba uma ho medida 3×3 ne’ebé Modesta Soares hela hamutuk ho bei-oan na’in rua no animál sira ne’ebé hakiak, nune’e Xefe Estadu para nia karreta no tun hodi hasai fotografia inklui husu tuir kona-ba inan faluk ne’e nia moris.
“Iha fulan balun liu ba, ha’u mai iha ne’e (Laklubar), ha’u hare uma ida, ha’u para no tun hodi hasai foto. Ko’alia ho uma na’in, avoo ferik ne’e (Modesta) nia oan sira, hafoin hateke fali, afinál Avó ferik hela iha fatin ida aat loos, hamutuk ho fahi ho animál seluk, uma la iha,” esplika PR Horta.
Aleinde ne’e mós, Xefe Estadu deside oferese uma ida ho orsamentu $.6.500.00, ne’ebé fahe ba uma, kioské no harii mós fahi-luhan ho montante $.500.
“Prezidénsia Repúblika halo uma ida ho lalais kedas no entrega ho orsamentu $.5.000.00 no aumenta ho $.1.000.00 ba kioské (inklui sasan). Halo mós fahi-luhan, atu nune’e Avó Modesta kontinua halo nia kriasaun animál,” tenik Xefe Estadu.
Uma ne’ebé Prezidénsia Repúblika harii, ho medida 7 x 6, fahe ba kuartu 2, sala vizita ida, inklui ho kioské ida ho durasaun konstrusaun kuaze fulan 2. Badaen mai husi ekipa SSAS-PR hamutuk ema na’in 6.
Iha fatin hanesan, Xefe Suku Orlalan, Carlos José Alves, apresia inisiativa husi Prezidénsia Repúblika iha asaun karidade ne’ebé fó ba nia komunidade vulneravel.
“Hanesan autoridade lokál Orlalan nian, ami agradese no apresia tebes ba Prezidente Repúblika ba jestu karidade ida ne’e, tanba tulun mós ami nia komunidade liuliu ida ne’ebé mak presiza. Hanesan ita-nia inan feton ne’e, kbiit-laek tebes, nia hela iha uma ne’ebé ladi’ak,” dehan Xefe Suku Orlalan.
Lider komunitáriu ne’e mós husu Prezidénsia Repúblika atu kontinua nia atividade sosiál ne’e ba inan faluk kbiit-laek no família barak ne’ebé presiza tebes tulun liuliu halo uma no oferese kióske hodi hatutan moris.
Entretantu, durante mandatu hahú fulan Maiu 2022, Prezidénsia Repúblika atuál hala’o ona atividade apoiu sosiál hamutuk 700 resin ona ba família benefisiáriu sira kuaze 1000 resin iha territóriu nasionál tuir programa prinsipál sira ne’ebé difini ona durante mandatu atuál Xefe Estadu Horta.
Jornalista : Mariano Do Santos Abi/Julião da Silva
Editór : Orlando Magno
