(Díli) Mudansa – Loron 30 de Agostu, ohin Timor-Leste selebra dala ida tan ba tinan 24, luta dada to’o iha tinan 24, hafoin tinan 1999, ohin loron to’o ona tinan 24, ho ida ne’e, Vise Primeiru Ministru, Ministru Coordenadór dos Assuntos Sociais e Ministro Desenvolvimento Rural e Habitação Comunitária, Mariano Assanami Sabino Lopes, hatete, ba ukun na’in hotu-hotu, nafatin onestu, dedika ida-idak nia aan ba serbisu tomak, hodi kontinua realiza mehi lutadór sira nian.
“Mai hotu-hotu ita tenke reforsa fila fali mehi povu nian, barak mak la iha ona ita nia leet, barak maka fila ona ba Na’i Maromak, maibé ita hotu-hotu ne’ebé sei moris tenke kontinua nafatin realiza sira nia mehi,” Assanami hatete ba Jornalista sira hafoin kari ai-funan iha Kruz Boot Santa Cruz, Kuarta 30/08/2023.
Nia aumenta, joven sira, ikus no ba mate restu sira ho mós inan aman sira hotu, apresia, agradese orgullu no ondra tebes ba povu tomak ne’ebé determina nasaun iha tinan 1999 ho situasaun ne’ebé defisil tebes, bainhira Assanami ho Joven rejistensia sira seluk halo mobilizasaun ba fatin-fatin, iha fatin hotu-hotu kuaze ataka iha, halo problema, maibé povu ida ne’e berani duni ho aten berani hodi ba tu’u independensia ida ne’e.
Ba joven sira, Arte Rituais ho Arte Marsiais sira hotu-hotu katak, sira nia determinasaun atu fó aan ba mate maka ohin ema hotu bele goza nasaun Timor-Leste nia liberdade, tan ne’e maka ohin sira ne’ebé sei moris tula nafatin iha ida-idak nia kabas, para halo estabilidade di’ak, garantia ba liberdade ba ema ida-idak, tanba ema ida-idak nia liberdade ne’e sosa ho mate, ruin ho ran ne’ebé maka fakar ran atu hetan ukun an.
“Ha’u hanoin ba Arte Rituais ho Arte Marsiais sira hotu, dezde uluk mós hola parte iha rejistensia, tan ne’e sé de’it maka hola parte, ne’e liberdade hotu-hotu nian, maibé saida maka ita iha, ita hotu-hotu responsabilidade ida de’it, garantia liberdade ba ema hotu-hotu no kuda metin kultura pas ho domin no hakmatek, kultura famíliar, kultura fraternnidade ba ita nia rai, tanba ita nia rai ki’ik ida, maibé sosa ho terus ho mate maka ita ohin hetan ita nia independensia ho liberdade,” nia alerta.
Nia subliña, nune’e sira ne’ebé moris, tenke garantia liberdade ba ema hotu-hotu, feto ka mane, ki’ik ka boot, fraku ka forsa, maibé tenke hotu-hotu iha lei, goza nia liberdade para moris ho hakmatek ba oin. Tanba ne’e, sira ne’ebé mak moris tenke fó kontinuidade ida ne’e, nafatin moris ho valór ne’ebé uluk defende direitu umanu, diretu garantia liberdade ba ema hotu-hotu, ha’u hanoin ida ne’e ita tenke kontinua.
Nia afirma tan, ida-idak iha nia partidu, ida-idak iha nia organizasaun, ida-idak iha nia Arte Rituais ka Arte Marsiais, maibé ema hotu ida de’it, mesak Timor nia oan, huun ida, abut ida, povu ida, rai Timor ida de’it, nune’e tenke dignifika rai ne’e hodi forsa nafatin ba oin.
“Bainhira ita hateke ba kotuk terus iha ne’ebá, ita tenke hateke ba oin ho esperansa, ba joven sira no jerasaun foun sira no la kleur tan hametin tan ita nia rekonsiliasaun para Timor ne’e fraternnidade ne’e bele metin liu tan,” nia hakotu.
Jornalista: Mariano Do Santos Abi
Editor: Felisberto F. Da Costa
