(Dili) Mudansa – Sekretáriu Estadu Komunikasaun Sosiál (SEKOMS), Expedito Dias Ximene informa, nia parte sei esforsu an oinsá bele fó subsídiu ba média konvensionál no online sira iha Timor-Leste nune’e bele hadi’a bein estár jornalista nian, tanba ida ne’e planu prioridade.
Nune’e bele foti kualidade produtu jornalístiku no mós fó bein estár ba jornalista sira, ida ne’e mak SEKOMS hanoin atu halo iha loron 120 nia laran.
Nia haktuir, durante Loron 120 ne’e oinsá atu fó atensaun ba média konvensionál sira, Média Plataforma sira, ida seluk maka oinsá bele halakon informasaun Hoax hodi hametin no haburas liu tan kualidade jornalístika iha rai laran.
“Ita hanoin sei fó subsídiu ba média privadu liuliu média online sira bele apoiu liu husi direita ou indireta hodi hasa’e bein estár jornalista sira nian,” dehan Expedito Dias ba jornalista hafoin simu pose iha Palásiu Prezidente Bairo Pite Dili, sábadu, 01/07/2023.
Expedito esplika, sira sei ko’alia kle’an liu tan atu uza formatu maibé objetivu maka oinsá bele fó apoiu ba média sira, tanba média estatál RTTL ho Tatoli iha ona osan, maibé média konvensionál no online sira ne’ebé rejistu iha Konsellu Imprensa seidauk hetan, hirak ne’e mak SEKOMS presiza fó apoiu.
“Ami sei tuur hamutuk ho kolega sira husi komunikasaun sosiál depois bele kria planu ne’ebé di’ak ba dezenvolvimentu Komunikasaun Sósial, Subsidiu ba média ne’e prioridade,” nia deklara.
Expedito akresenta, kona-ba Formasaun tenke iha kontinuasaun ba beibeik no mós CEFTEC bele muda ba institutu ida halo formasaun espesial ba jornalista sira husi nivel Baziku, Medium no Avansadu tanba planu prioridade maka hadi’a produtu jornalista no mós fó subsídiu ba média sira.
Jornalista : MédiaMudansa
Editór : Orlando Magno
