(Dili) Mudansa – Primeiru Ministru (PM) atuál Kay Rala Xanana Gusmão informa, governu da sia kompromete sei dada kadoras mai kosta súl nune’e bele kria kampu traballu ba povu Timor-Leste.
“Governu kompromete atu lori kadoras greater sunrise nian ba kosta súl Timor-Leste,”Xefe governu atuál hasai deklarasaun ne’e hafoin asina termu tomada pose ho Prezidente Repúblika Jose Ramos Horta iha Palasiu Prezidensial Bairro Pite, sábadu 01/07/2023.
PM Xanana relata, planu dezenvolvimentu ida-ne’e sei hatudu ba mundu katak kadoras mai Timor-Leste nu’udar solusaun viabilidade no ekonomikamente sira, kona-ba dezenvolvimentu indústria petrolíferu ida mak sei hamosu diferensiál ekonómiku diretu ba populasaun.
Maibé nia hatete iha dezenvolvimentu iha kosta súl ne’e, husi ámbitu dezenvolvimentu ba setór petrolíferu no gás sai ona fatin prioridade ida harii baze fornesimentu ida rutinària no kadoras iha rejiaun ne’ebá kosta súl sai hanesan investimentu ne’ebé nesesária atu Timor-Leste kria ninia indústria petrolíferu rasik hodi hamosu servisu ba timoroan sira.
Nia haktuir, Aleinde ne’e governu mós iha prioridade nasionál ida atu finaliza negosiasaun kona-ba fronteira terestre no marítima ho indonézia, no nia solusaun tuir de’it saida mak direitu internasionál haruka.
“Ha’u aproveita oportunidade ida-ne’e, atu deklara katak nonu governu sei fó atensaun espesiál ba investimentu ho nune’e sei simu ho di’ak empreza estranjeiru ne’ebé iha perspetiva atu ajuda dezenvolve país ne’e, no kria empregu ba timoroan sira,”katak nia.
Maski nune’e, IX governu mós sei haka’as an atu hadi’a prestasaun servisu iha área fundamentais mak hanesan, saúde sei halo buat hotu-hotu atu aumenta kapasidade téknika ba pesoál médika hodi bele komesa tratamentu ba moras oioin ne’ebé baibain presiza trata iha rai li’ur.
no mós área edukasaun iha komprimidu atu haree kle’an problema kona-ba asesu edukasaun, tanba área edukasaun, buat ne’ebé provoka situasaun difisil tebes ba família vulneravel sira, maka governu hakarak asegura kualidade ensinu iha nivel hotu-hotu liuhusi kapasitasaun ba profesór.
Jornalista : Julião da Silva
Editor : Orlando Magno
