(Dili) Mudansa – Prezidente Repúblika (PR) Jose Ramos Horta hatete, maski Lider Karismatiku Kay Rala Xanana Gusmão ho nia alin Jeneral Taur Matan Ruak la se oin ba malu durante mandatu governu da ualu, tanba diferensiál iha ideia maibé atu hadame fali sira nia amizade nu’udar maun alin, la presiza ema atu sai matadalan.
“Sira na’in rua nia unidade metin la presiza ema ida atu lori sira hamutuk. Agora to’o ona. Funu-na’in boot rua husi nasaun ida-ne’e mak estratéjia militár ida-ne’ebé sai polítiku, maibé ho esperiénsia riku ida-ne’e husi tinan 20 liu ba harii nasaun ne’e nian,” dehan Ramos-Horta iha palásiu Prezidensial, Bairro Pite, 30/06/2023.
Tanba ne’e, Horta agradese ba Primeiru Ministru (PM) Taur Matan Ruak maski hasoru situasaun difisil iha nia governasaun, ohin konsege hamutuk ho Primeiru Ministru Indizitadu Kay Rala Xanana Gusmão hodi hasoru malu ho Xefe Estadu atu ko’alia oinsá mak bele garante prosesu tranzisaun mandatu governu ho di’ak.
“Agradese boot ba Primeiru Ministru Taur Matan Ruak, tempu ne’ebé todan, situasaun difisil iha rai laran, ohin ho maun Bo’ot Xanana, ami hasoru malu para atu ko’alia nu’udar Primeiru Ministru sesante ho Primeiru Ministru foun, iha Hand Over,” nia afirma.
Horta hatete tan, iha prosesu ida-ne’e, Relatoriu dokumentu hotu-hotu husi oitavu governu tenke iha ona nune’e bele entrega ba governu da sia atu Primeiru Ministru foun tau iha meza, no mós Ministru sesante sira seluk bele husik relatóriu ba Ministru foun sira.
“Primeiru Ministru sesante hatete ona, fó orden ba ministru sesante sira, se governu foun presiza ministru sesante atu esklarese buat ruma, presiza disponivel nune’e servisu hamutuk didi’ak hodi tranzisaun ba governu foun la’o ho di’ak,” nia Akresenta nia.
Aman ba nasaun ne’e informa, Primeiru Ministru sesante rasik hatete ona, sempre disponivel atu apoiu governu, bainhira Ruak, nia prontu apoiu.
Jornalista : Julião da Silva
Editór : Orlando Magno
