(Dili) Mudansa – Feto ne’ebé brani servisu iha área peskas la signifika hadau mane nia servisu maibé fiar an ho kapasidade ne’ebé iha katak feto feto mós bele.
Traballadóra Peskas, Maria Goreti Hobe apresia ba governu Timor Leste liuliu ba Sekretariu Estadu Formasaun Profisionál Empregu (SEFOPE) tanba loke oportunidade ba Joven sira hodi servisu iha Korea Súl.
Traballadóra Maria Goreti Hobe informa, nia sente kontente bainhira hetan oportunidade ne’ebé oferese husi governu Timor leste tanba bele lori feto Timor Leste nia naran hodi ba servisu iha Korea Súl maski iha área peskas.
“La espera ha’u bele monu iha área peskas, maibé ha’u nafatin agradese ba oportunidade ne’ebé ha’u hetan maibé la signifika ha’u hadau mane nia servisu maski ema barak dehan feto labele servisu iha área peskas maibé feto ho mane iha direitu hanesan,” Katak Maria ba Jornalista Média mudansa iha Salão Timor Lodge Kinta feira 29/05/2023.
Maria akresenta, bainhira nia sei tuir hela formasaun lian Korea, Maria iha planu katak tenke husik Timor hodi ba servisu iha Korea Súl no nia sei fahe tempu bainhira fila mai Timor Leste sei loke kursu lian Korea hodi realiza mehi ne’ebé durante ne’e nia planu hela.
“Bainhira ha’u fila mai Timor sei loke kursu Korea ba ha’u-nia alin sira iha bairru ne’ebé ha’u hela hodi hanorin oinsá atu hakerek no lee karik sira remata ona estudu bele kontinua kursu nune’e bele hetan buat foun husi ha’u,” nia afirma.
Tuir planu ne’ebé iha, Maria hakarak loke Guest House /uma ki’ik oan tanba fatin iha timor maioria fatin turizmu barak liuliu iha tasi ibun nune’e fó fali servisu ba joven sira ne’ebé seidauk hetan oportunidade.
“Ha’u-nia mensajen ba foin-sa’e sira labele mete ba problema de’it tanba ita idade ne’ebé iha ona 17 ba leten tenke hanoin luan oinsá atu buka osan hodi sustenta uma laran liuliu ba ita-nia an rasik bainhira ita harii uma kain foun entaun aproveita didi’ak tempu agora tanba kursu Korea loke iha fatin barak,” nia sujere.
Entretantu, Domingo semana ne’e Trabalhador ne’ebé atu arranka ba Korea Súl hamutuk ema na’in 41 kompostu husi mane 40 no feto 1, traballadór na’in 37 sei ba servisu iha área peskas no mós traballadór na’in 4 sei ba servisu iha Fabrika.
Jornalista : Domingas Viana
Editor : Orlando Magno
