Fernanda Lay Promete, Konfiansa Ne’ebe Nia Hetan Sei La Monu Ba Rai

banner 120x600

(Dili) Mudansa – Eleitu Prezidente Parlamentu Nasional (PN) kompromete ba konfiansa ne’ebé nia hetan husi Estrutura partidu CNRT, Deputadu sira no mós Komfiansa husi povu Timor-Leste nian sei la monu ba rai tan nia prontu responsavel ba pozisaun neebe nia hela.

Lia hirak ne’e hato’o husi Eleita Prezidente PN Maria Fernanda Lay liu husi ninia intervensaun hafoin simu meza Parlamentu husi Prezidente Parlamentu sesante Aniceto Guterres iha Parlamentu nasionál Dili, kinta 22/06/2023.

Eleita Prezidente PN Maria Fernanda Lay informa, Iha oportunidade ida ne’e, nia partilla agradesimentu ba konfiansa no fiar ne’ebé mai husi Prezidente Partidu CNRT Xanana Gusmão, Sekretariu Jeral Partidu CNRT Francisco Kalbuadi Lay no mós ba estrutura tomak husi Partidu Demokratiku ho CNRT, militantes, aliadus no povu tomak ne’ebé fó ona fiar ba Partidu CNTR hodi lidera Parlamentu Nasional.

“Konfiansa ne’e sei la monu ba rai, konta mós distintu deputadu/a sira hotu nia apoiu iha auto- plenária VI lejislatura ida nee, hau fiar metin ita hotu sei hamutuk hala’o mandatu tuir de’it konstituisaun haruka nu’udar lejislador, fiskalizador no mós desizoens polítika,” Fernada Lay deklara.

Lay relata, nia komprimidu sei fo kontinuidade ba servisu hirak ne’ebé la’o husi Prezidente Parlamentu Nasional Sesante sei mantein komunikasaun ho sira, no sei dere bankada ida-idak nia odamatan hodi konsolida di’ak liu tan funsionamentu órgaun lejislatura ida ne’e.

“Hanesan Timor oan ita hotu orgullu tanba kontribui ona prosesu demokrátiku ho matenek no maduru hodi jere diferensa Partidu Politikus hotu mantein pás, Timor oan nia unidade metin no forte ba beibeik,” nia haktuir.

Prezidente PN dehan, Iha faze foun ne’e, halo estadu Timor- Leste no povu tomak bele hi’it ulun hateke dook ba oin ho fiar an sai orgullu nu’udar estadu ida independente ne’ebé demokrátiku hodi dignifika martires de pátria sira nia mehi hodi lori povu Timor-Leste ba moris di’ak iha estadu de direitu demokrátiku.

Hanesan segundu órgaun estadu Parlamentu nasionál iha VI lejislatura simu naha todan tanba tenke konsolida hikas ita-nia instrumentu legais sira atu responde ezijénsia povu nian tanba iha tempu naruk ita hotu haree no rona katak povu lakohi atu hein kleur tan.

“Parlamentu nasionál tenke sai órgaun povu nian, no iha fatin ne’e duni ita hotu sei dignifika órgaun lejizlativu, ho produtu lejizlasaun no polítika ne’ebé aposta ba dezenvolvimentu inkluzivu, Dalan loos liu mak ita sei hamutuk hakat ba mudansa hametin relasaun di’ak ho órgaun estadu sira seluk liuliu ho governu no instituisoens sira seluk hodi serví di’ak liu tan,” nia afirma.

Nia afirma, fiar metin bainhira hamutuk ho Distintus Deputadu 64 iha parlamentu ida ne’e servisu hanesan komisoens espesializadas parlamentares sei funsiona di’ak liu tan no mós sei mantein relasaun di’ak ho partidu polítiku sira hotu hametin relasaun ho média no ONG sira.

Inklui sei fortalese relasionamentu grupu amizade parlamentares ho paizes sira seluk, hanesan ASEAN, CPLP, Paises membru G7+ no seluk seluk tan, tuir konkordante no komprimisiu.

Fernanda Apela ba komponentes sira hotu liuliu ba funsionariu Parlamentu Nasional Asesores, Tekniku apoiu kada seguransa no kontratadu iha ámbitu parlamentu nasionál tenke kolabora malu servisu hamutuk no presta sira nia dezempeñu ho dedikasaun, Profisionál tanba povu hein hela. Atu moris di’ak.

“Ita-nia estadu ezije atu rekupera lalais Timor-Leste nia ekonomia no joven barak hakarak oportunidade ba empregu ho setór privadu presiza ambiente no negósiu ida ne’ebé saudavel, tanba ne’e Parlamentu Nasional tenke foti papél nu’udar instituisaun kadernizadora ba proximu governu mai ne’e tenke lori programa pro povu no orsamentu neebe bele responde duni povu hodi hetan moris di’ak haku’ak boot ba ita hotu,” nia esklarese.

Nune’e mós Eleita prezidente PN Maria Fernanda Lay hato’o mós ninia agradesimentu ba ba na’i maromak, rai lulik no matebian sira hotu tanba ho tulun no bénsaun hodi tama iha faze foun hafoin Timor-Leste hakat liu eleisaun prezidensiál no eleisaun parlamentár iha tinan ida ne’e.

Jornalista : Ekipa Media Mudansa

Editor        : Orlando Magno

banner 325x300