(Dili) Mudansa—Prezidente Partidu Kongresu Nasionál Rekonstrusaun Timorense (CNRT) Kay Rala Xanana Gusmão, fó ninia apresiasaun ba povu liuliu joven sira ne’ebé mak asumi ona responsabilidade hodi kria pás no estabilidade iha Eleisaun Parlamentár 2023.
“Ha’u apresia tebetebes, ba povu tomak iha Timor-Leste, ho konsiénsia populár, liuliu husi joven sira, iha pás ho estabilidade,”dehan Xanana liuhusi konferénsia imprensa iha Sede Partidu CNRT Bairro dos Grilhos, tersa 23/05/2023.
Lider Karismatiku ne’e hatete, iha kampaña no eleisaun ba tinan ida-ne’e, mosu duni problema ki’ik balun maibé ne’e ladún boot hanesan ho eleisaun sira tinan uluk, agora joven sira komesa hanoin ona katak Timor-Leste laiha fatin ba violénsia, ida ne’e di’ak no importante.
Xanana mós sente kontente tanba povu deside ona hodi fo konfiansa ba CNRT iha Eleisaun Parlamentar bazeia ba rezultadu provizóriu hosi CNRT rasik liga ho rezultadu finál provizóriu hosi STAE hatudu katak iha eleisaun ne’e povu fó konfiansa bá partidu CNRT ho votu 288,101 no persentajen 41,62 ka kadeira parlamentár 31.
Ho nune’e, CNRT deklara publikamente katak partidu CNRT maka manán duni eleisaun parlamentár ne’ebé hala’o iha loron 21 fulan Maiu 2023.
Mezmu rezultadu provizóriu hatudu ona CNRT manán ho maioria simples, maibé CNRT seidauk bele ko’alia kona-ba atu halo koligasaun ka insidensia parlamentár ho partidu ruma atu forma Governu da sia períodu 2023-2028.
“Ho ida-ne’e ami hein de’it STAE publika tiha no ami sei konfere no hanesan no karik la hanesan ami sei hosu malu tanbasá la hanesan,” Xanana tenik.
Portantu tuir, Rezultadu Final Provizóriu ne’ebé média mudansa asesu iha pájina Sekretariadu Tékniku Administrasaun Eleitorál (STAE) katak, partidu CNRT provizoriamente lidera ho votu 288,101 ho kadeira 31 iha Parlamentu Nasionál enkuantu partidu FRETILIN iha segundu lugár ho votu 178,248 no kadeira 19 iha Parlamentu Nasionál.
Tuir kontajen votu ne’ebé STAE halo, kada partidu ida tenke hetan 4% bá leten hafoin bele liu barreira, nune’e partidu sira ne’ebé liu ona barreira mak, CNRT, hetan votu 288,101 (%42,62) ho kadeira 31. FRETILIN, hetan votu 178,248 (%25,75) kadeira 19.
Tuir kedas Partidu Demokrátiku (PD) hetan votu 64,493 (% 9,3), ho totál kadeira 6. No mós KHUNTO hetan votu 52,021 (%7,52), kadeira 5, no Partidu Libertasaun Popular (PLP) hetan votu 40,696 (% 5,88) hetan kadeira 4.
Maibé ba Partidu sira ne’ebé la liu barreira iha Parlamentu Nasionál maka Partidu ho númeru sorteiu 6, Partidu Os Verde Timor (PVT) hetan votus 25,100 ekivale ba persentajen 3,6%. Partidu ho númeru sorteiu 8, Partidu Unidade Dezenvolvimentu Demokrátiku (PUDD) hetan votu 21,639 ekivale ba 3,13%. Partidu ho númeru sorteiu 17, partidu asosiasaun Popular Monarika Timorense (APMT) hetan votus 6,678 ekivale ba 0,96%. Partidu númeru sorteiu 2, partidu Libertasaun Povu Aileba (PLPA) hetan votus 3,272 no 0,47%.
Partidu ho númeru sorteiu 13, partidu Centru asaun sosiál demokrata Timorense (CASDT) hetan votus 3,169 ekivale ba 0,46%. Partidu ho númeru sorteiu 15, Partidu sosialista Timor (PST) hetan votus 2,415 ekivale ba 0,35%. Partidu ho númeru sorteiu 9, Partidu Republikanu (PR) hetan votus 1,558 ekivale ba 0,23. Partidu ho númeru sorteiu 16 Partidu Demokrata Kristaun (PDC) hetan votus 1,262 ekivale ba 0,18%. Partidu ho númeru sorteiu 7, partidu Uniaun Demokrata Timorense (UDT) Hetan votus 1,256 ekivale ba 0,18%.
Partidu ho númeru sorteiu 10, partidu Unidade Nasionál Demokratika Resistensia Timorense (UNDERTIM) hetan votus 1,022 ekivale ba 0,15%. Partidu ho númeru sorteiu 14 partidu Movimentu Popular Libertasaun Maubere (MPLM) hetan votus 642 ekivale ba 0,09% no ikus liu maka Partidu ho númeru sorteiu 1, Partidu Dezenvolvimentu Nasionál (PDN) hetan votus 597 ekivale ba 0,09 %.
Totál eleitór sira ne’ebé maka rejistu hosi baze dadus STAE nia hamutuk 890,145, hosi númeru eleitór sira ne’ebé iha, eleitór ne’ebé partisipa iha eleisaun Parlamentar, tinan ne’e, hamutuk 705,683, ho taxa partisipasaun 80,3%, mane 362,415 (51,4%), no Feto 343,268 (48,6%).
Enkuantu votu Nulu iha 10,222 (1,45 %), Votu reklamadu 515 (0,07%), votu abandona iha 24 (0,01%), Votu branku iha 2,692 (0,38%), votu rezeitadu iha 58 (0,01%), no ikus liu maka votus válidu 692,169, (98, 08%),
Totál akta hamutuk 1472, no akta husi Munisipiu sira, Iha Aleiu 93, Ainaro 90, Atauro 15, Bobonaro 150, Baucau 150, Covalima 100, Dili 147, Ermera 140, Lautem 100, Liquiça 85, Manufahi 115, Manatuto 83, Viqueque 112 no RAEOA 80. Entertantu akta husi rai liur hamutuk 9, no akta husi rai liur ne’e Australia iha akta 3, korea do sul akta 2, Ingraltera 3, Irlandia do Norte akta 1 no Portugal 3.
Jornalista : Ekipa Media Mudansa
Editór : Orlando Magno
