(Dili) Mudansa – Misaun Observasaun Eleitorál (MOE) Liu husi organizasaun Comunidade dos Paises de Lingua Portuguesa (CPLP) ne’ebé observa prosesu eleisaun parlamentár (ELPAR) kongratula estadu Timor Leste tanba realiza eleisaun ne’ebé di’ak tebes tuir prosedimentu eleitorál ne’ebé estabelese ona.
Embaixadór Republica Angola Jose Marcos Barrica informa, sira fahe ekipa 5 iha munisípiu Dili ekipa 2 no ekipa ida ba kada munisípiu sira hanesan Baucau Ermera no Aileu hodi hala’o observasaun ba sentru votasaun hamutuk 76 ho eleitór hamutuk 143.775 kuaze 16%.
Iha munisípiu Dili Likisa no Manatuto sira estabelese kolaborasaun ida ho ekipa observadór husi G7+ ne’ebé observa sentru votasaun 81 ho eleitór hamutuk 88.223 besik porsentu 10.
“Ami kongratula votante sira, CNE, STAE no seguransa ne’ebé ho servisu profisionál no responsabilidade realiza prosesu votasaun la’o ho di’ak ema hotu ba tuir votasaun iha pás no hakmatek nia laran” dehan Jose Marcos Barrica liu husi konferénsia imprensa iha otél Novo-Turismo Dili, 23/05/2023.
Nia relata, iha prosesu observasaun ne’e sira identifika sentru votasaun ne’ebé asesivél no fasil ba eleitór sira, materiál ho kondisaun ne’ebé adekuadu ba funsionamentu hotu no kumpre mós ba prosedimentu votasaun nian hahú husi abertura to’o enseramentu votasaun no prosesu kontajen votu.
Kongratula autoridade sira RDTL ne’ebé realiza eleisaun parlamentár ho livre no transparente ho prosesu ne’ebé kredivel hodi permite partisipasaun ampla sidadaun sira nian iha prosesu polítika nasaun nian, liu husi ezerse direitu vota nian iha respeita ba igualdade sufrájiu no universál ho Liberdade espresaun asosiasaun.
“Ami nia observasaun iha prosesu votasaun buat hotu la’o ho di’ak tuir prosedimentu sira ne’ebé iha, maski iha krime eleitorál balun maibé sei prosesa tuir lei ne’ebé vigora” nia dehan.
Nia konklui katak, povu Timor Leste forma ezemplu di’ak ezerse direitu votu hodi reforsa demokrasia iha estadu direitu nasaun nian, kria koesaun ne’ebé di’ak iha komunidade CPLP nian.
Estajiadu : Zemidonio Martins
Editór : Orlando Magno
