(Dili) Mudansa – Enkaregadu Embaixada America iha Timor-Leste Tom Daley informa, jornalista sira tenke aprende no ko’alia barak hodi fahe esperiénsia oinsá dezafia malu durante iha treinamentu kona ba dezinformasaun no ódiu.
“Ha’u enkoraja Ita-Boot sira atu aprende barak liután, nune’e bele hato’o perguntas barak ba ita-nia oradór sira, tanba imi mak hamriik iha liña frente hodi haforsa Timor-Leste nia Demokrasia no harii sosiedade ida-ne’ebé koeñesidu liután,” Dehan Tom Daley ba jornalista hafoin abertura treinamentu Disinformasaun iha salaun CNC Balide Dili, kuarta (17/05/23).
Nia rekoñese no kontra informasaun ne’ebé la loos no dezinformasaun ne’e sai importante liután, ema hotu rona kona-ba ida-ne’e esperiénsia rasik iha média sosiál plataforma online sira seluk, bainhira média no públiku sira sein intensaun fahe lia-bosok ne’e ladi’ak dunik.
Hanesan Notísias Falsas, propaganda, boatus, no rumores,dezinformasaun, dala ruma asosiadu ho diskursu ódiu, bele mós hamosu konsekuénsia grave barak, bele hafraku konfiansa iha Instituisaun Demokrátika sira halo grave liu tensaun sosiál sira no mós hamosu violénsia.
“Presiza jornalista no estudante sira ne’ebé dedika hanesan Ita-Boot sira hotu iha ne’e ohin atu bele komprende oinsá deteta no hapara informasaun ne’ebé la loos no déz informasaun liu husi rekursu sira ba verifikasaun faktu no dezenvolvimentu profisionál.”Tom akresenta.
Nia afirma, se Informasaun la loos no déz informasaun buras liu bainhira ema simu de’it buat ne’ebé sira haree iha notísia ka iha internét sein halo avaliasaun ho krítiku ba informasaun ne’e, iha ne’e maka sira intervén.
“Nu’udar jornalista no lideransa sira iha futuru, Ita-Boot sira iha papél importante atu kontribui ba sosiedade ne’ebé informadu liu iha Timor-Leste, ha’u haksolok tebes, tanba Ita-Boot sira bele kontinua abilidade jornalizmu no verifikasaun ba faktu liuhusi treinamentu ida-ne’e.” Nia relata.
Tom Daley sente louva jornalista sira nia kompromisu ba jornalizmu no ba promove lia-loos tanba ne’e Estadus Unidus Amérika prontu apoia nafatin ba jornalista sira.
“Ha’u dezeju susesu tomak ba imi iha treinamentu ne’e no ba imi-nia esforsu iha futuru, obrigadu ba ita-boot sira mai ona iha ne’e ohin, ha’u kontente mai hamutuk ho Ita-Boot sira hodi loke programa ne’e, la haluha mós hato’o obrigadu ba Asosiasaun Jornalista Timor-Leste (AJTL), ne’ebé organiza treinamentu importante ida-ne’e.” Nia subliña.
Iha fatin hanesan prezidente Asosiasaun Jornalista Timor-Leste (AJTL) Zevonia Viera argumenta, informasaun ne’e importante loos ba jornalista sira kona ba déz informasaun ka ódiu iha era Digital Internet.
AJTL iha komitmentu apoiu membru AJTL sira la’os jornalista liuliu iha média Online, Radiu komunidade, Televisaun no jornál sira iha koñesimentu kle’an kona ba halo verifikasaun ba informasaun falsu no kontra insulta ódiu ne’ebé fó impaktu ba sosiedade liuliu Vulneravel sira feto no ema Defisiensia iha Era Digital.
“AJTL iha responsabilidade uza sosiál média, tanba ne’e apresia tebes ba embaixada Amaerica ne’ebé kontinua fó fiar ba AJTL hodi organiza treinamentu ne’ebé jornalista estudante no mós Radiu Komunidade iha área rurál.” Prezidente AJTL Zevonia akresenta.
Formasaun ne’e fahe ba Gruou rua (2) Grupi I loron rua partisipantes sira husi Radiu komunidade, estudante komunikasaun sosiál no média Online balu, Grupu II ne’e foka liu ba média Nasional sira iha Dili ida ne’e objetivu importante tebes.
“Espera ita boot sira aproveita di’ak ho treinadór sira ne’ebé fahe matenek ba imi fiar katak imi sei uza iha fatin servisu no la’ós iha fatin servisu de’it maibé iha uma mós imi sei aprende buat foun no barak liu tan ho treinadór husi Indonesia.” Nia hakotu
Jornalista : Delfina Borges
Editor : Orlando Magno
