(Dili) Mudansa – Dom Virgilio Kardeál do Carmo da Silva SDB hateten, parte Igreja husu ba responsavel partidu politiku sira iha tempu ikus kampaña nia laran buka hakmatek fó liafuan matak malirin atu hakalma joven sira.
Molok hahú kampaña ne’e Komisaun Nasional Eleisaun (CNE sigla Portugues) bolu ona Lider partidus no na’i uluk sira ba hotu iha CNE fó hanoin ba malu atu hotu-hotu haka’as an kontribui ba pás.
Parte CNE no mós parte Igreja nian husu dezde inísiu ba buat hirak ne’e, maibé buat sira akontese hanesan ne’e kontinua husu liuliu ba iha Lider Partidu ida-idak haka’as an nafatin buat ne’e la’o kapas.
“Iha momentu ikus ne’e ita sente no rona situasaun manas uitoan tanba joven sira ataka malu, buat sira ne’e hotu ita la gosta rona no lakohi akontese, ita husu ba responsavel Partidu Politiku sira iha tempu ikus kampaña nia laran fó liafuan di’ak matak malirin atu hakalma joven sira, la’os atu lori emosaun,” Dehan Dom Virgilio Kardeal do Carmo da Silva SDB ba Jornalista sira iha Igreja Sagrada Korasaun De Jesus Becora Dili, Segunda (15/05/23).
Kardeál afirma, momentu ikus ne’e provoka halo situasaun manas uitoan, tanba ne’e apela ba enkaregadu sira liuliu lider partidu sira atu fó hanoin ba militantes sira antes no depois kampaña, buka atu respeita no fó hanoin ba malu.
“Hau hanoin regulamentu ne’ebé governu halo maka tau tiha ona Komisaun Regulador Atre Marsiais (KRAM) hodi koordena hosi lider ida-idak, maibé iha loron hirak liu ba rona katak KRAM fó sai deklarasaun kona ba akontesimentu sira ne’e, naksalak hanesan bee kopu ida fakar tiha ona ita labele kuru fila fali,” Nia subliña.
Tanba ne’e husu hotu-hotu haka’as an fó liman ba malu kria dame haburas unidade ne’ebé di’ak hodi hakat ba Eleisaun iha dia 21 loron Domingo oin mai, ema hotu bele hakat ho hakmatek no eleisaun ne’e bele la’o ho di’ak.
Jornalista : Delfina Borges
Editór : Orlando Magno
