(Dili) Mudansa – Prezidente Partidu Congresso Nacional Reconstrusão de Timor (CNRT) Kay Rala Xanana Gusmão nia parte prontu halo mudansa ba Timor bainhira povu fó fiar iha eleisaun parlamentár ne’ebé akontese iha loron 21 maiu 2023.
Xanana hato’o Asuntu ne’e bainhira Partidu CNRT hala’o kampaña ikus iha Tasi tolu Dili kinta 18/05/2023.
“Hau katuas ona presiza deskansa maibé ha’u hakarak Salva lai rai no estadu Direitu Demokratiku hodi fó tutan ba imi nune’e estadu Direitu ne’ebé moos. Se imi hili ha’u tinan nia laran ha’u hakarak no prontu atu hadi’a tiha buat ne’ebé la loos,” nia relata.
Tanba ne’e nia husu ba militante CNRT no ba povu sira liuliu ba juventude sira ne’ebé hakarak halo mudansa tenke hili partidu CNRT no mós to’o eleisaun vota ba númeru 12.
“Se hakarak mudansa bolu malu hodi fó hatene ba malu iha loron eleisaun 21 maiu 2023 vota ba númeru 12 nune’e halo mudansa no salva ita-nia estadu de Direitu Demokratiku liuliu ba imi jerasaun foun nia futuru tanba futuru no Destinu nasaun RDTL nia iha juventude nia liman,” Xanana Promete.
Nia afirma, Se la halo mudansa ba rai ida ne’e mak buat hotu sei sabraut no aat liu no la’o la di’ak antes to’o jerasaun foun sira nia tempu tuir mai tanba ne’e tenke halo mudansa agora nune’e ba futuru foin-sa’e sira dezenvolve di’ak liu tan.
“Atu halo mudansa tenke hasai tiha ema aat, na’ok teen iha estadu nia laran no hamoos tiha fo’er harii fali estadu Direitu demokrátiku ne’ebé di’ak hodi fó tutan ba jerasaun foun kontinua dezenvolve ita-nia rai no hadi’a povu nia moris,” nia deklara.
Xanana konta tutan komunidade munisípiu Atauru nia lian, Bainhira ema boot ruma mai mak ami nia eletrisidade lakan oras 24 maibé boot sira fila tiha eletrisidade Mate no mós kondisaun Estrada aat maski Atauru sai ona munisípiu ida iha Timor-Leste.
“Atauru mós tenke hadi’a sistema hodi loke zona espesiál ida tanba Atauru nia Biodiversidade ne’ebé moris iha tasi laran Uniku tebes no riku iha mundu tan ne’e ita tenke konserva ida ne’ebá,” Prezidente Partidu CNRT akresenta.
Xanana realsa, nia parte temi programa prioridade polítika ida tenke halo auditoria oinsá atu hatene oitavu governu ne’ebé gasta ka estraga osan $.11 billoens durante sira nia mandatu tanba durante Xanana haree iha munisípiu balu kuaze kondisaun estrada la di’ak.
“Osan 11 biliaun Dolas dehan osan la iha tanba tanba ema balu dehan osan sei funan hela entaun ita seidauk bele ku’u tanba ne’e dezenvolvimentu rai laran nafatin hakdasak,” nia informa.
parte ikus Xanana hatete, Iha Mos asuntu ida ne’ebé hanesan programa ida ba katuas ho ferik sira nia sei bolu ho liafuan eroi ba libertasaun no sei tane aas.
“Tanba iha 1999 ha’u-nia pregu ida de’it ne’e la vale buat ida maibé katuas ho ferik sira nia pregu mak vale tanba ida ne’e mak eroi nasionais mak povu la’ós ha’u, ida ne’e mak ha’u hato’o ba imi no haku’ak boot ba ita hotu I Love You All,” Xanana tenik.
Nune’e mós iha kampaña ikus ne’e militante balu husi Partidu FRETILIN deside afilia an ba partidu CNRT ho razaun ida katak atu apoiu Prezidente Partidu CNRT Kay Rala Xanana Gusmão iha eleisaun parlamentár tinan ne’e.
Jornalista : Ekipa MediaMudansa
Editór : Orlando Magno
