(Ermera) Mudansa – Relasiona deklarasaun prezidente PVT Antonio Lelahunu da Cruz nia ne’ebé ko’alia iha palku kampaña polítika iha loron 17 fulan maiu tinan ne’e iha munisípiu Ermera katak Ermera oan barak mak halo vídeo porno.
Porta-Voz Juventude Postu Hatolia Munisipu Ermera Jermenino Soares da Silva informa, Joventude Munisipiu Ermera Postu Hatolia la konkorda ho liafuan Prezidente PVT Antonio Lelahunu cruz ko’alia Ermera oan barak halo vídeo porno iha palku kampaña polítika laiha morál no Etika komunikasaun ba povu Ermera.
“lideransa ne’ebé la iha Moral no Etika komunikasaun ba ami povu Ermera laran tomak ofende tebes ami Ermera oan hatete katak Ermera Nia aktus morál laiha maturidade Politika Inmoral.” Dehan Porta-Voz Juventude Postu Hatolia Munisipu Ermera Jermenino Soares da Silva ba jornalista iha Manusae Ermera Sabadu, 20/05/2023.
Porta-Voz akresenta, Juventude Ermera oan husu ba inan-aman veteranus no antigu kombatentes libertasaun nasionál, Relijiozu, Estudantes, Intelektuis Akademiku no Juventude Ermera oan tomak ne’ebé namkari iha Timor laran tomak no mós iha rai li’ur, mai hamutuk unifika forsa ida, hodi kontra hahalok Inmoral.
“Husu ba parte hotu mai ita hamutuk hodi kontra hahalok inmoral defamasaun jeneralizasaun mai ita Ermera oan tomak ,liu husi komísiu hato’o husi Prezidente Partidu os Verdes Timor ne’ebé la iha Etika no hanoin rasionál iha palku polítika.” Nia afirma.
Tanba ne’e bazeia ba Konstituisaun RDTL iha Atigu 36 hateten,onra no privasidade katak ema ida-idak iha direitu ba onra no ba naran di’ak.
“Nia bele ko’alia Ermera oan barak halo vídeo porno, maibé iha faktus no dadus tuir nia liafuan ne’ebé nia hato’o, signifika nia desvaloriza Ermera nia kontribuisaun hahú husi prosesu luta ba ukun rasik an no iha prosesu konstrusaun Estadu.” Porta-Voz subliña.
Juventude Municipio Ermera Postu Hatolia (JME) prosesa prezidente PVT tuir Lei ne’ebé vigora iha Estadu Timor-Leste oinsá atu responsavel ba ninia liafuan hirak ne’ebé nia ko’alia.
“Ami JME hakarak hato’o ba RTTL.EP, Grupo Media Nasional (GMN) no Televizaun Edukasaun(TVE) konvida Prezidente PVT Antonio Lelahunu cruz no juventude intelektuál munisípiu Ermera hodi debate kona-ba asuntu refere, nia rekomenda.
Reprezenta Joventude Munisipiu Ermera Postu Hatolia hato’o mós parabéns ba loron Restaurasaun Indepedensia Timor-Leste nian ba dala XXI, parabéns mós ba Orgaun Soberania, Prezidente Republika, Governu, Tribunal Rekursus no mós Parlamentu Nasional Saudasoens progresivu ba timor laran tomak.
Jornalista : Delfina Borges
Editór : Orlando Magno
