(Dili) Mudansa – Ministeiu Edukasaun Juventude no Desportu (MEJD) liu husi Diresaun Edukasaun Munisipiu Dili Lansa programa Merenda Eskolar, programa kontinuasaun maibé muda sistema tinan kotuk nian hodi forma Ekipa ida kona ba Jestaun Programa Merenda Eskolar (JPME) mak sei jere.
Diretór Edukasaun Munisipiu Dili Carlito hateten,Programa ida ne’e la’os foin mak hahú, maibé programa ne’e kada tinan kontinua de’it.
“Programa kontinuasaun ba tinan ne’e nia mekanizmu mak muda Sistema la hanesan ho tinan kotuk ,uluk programa merenda eskolár eskola rasik mak jere hodi halo jestaun, maibé tinan ida ne’e ita forma Ekipa JPME mak jere ba programa ida ne’e no Projeitu ida ne’e nia na’in mak Autoridade Munisípal sira.” Dehan Diretor Edukasaun Munisípiu Dili Carlito da Silva iha eskola EBC Fatumeta Dili, Segunda, (03/04/23).
Governante ne’e akresenta, Ekipa Jestaun Programa Merenda Eskolar iha munisípiu Dili hamutuk 17 maka koloka ba iha eskola Ensinu Baziku hamutuk 102 kompostu husi Benefisiariu hamutuk 49.262, kompostu husi Ensinu Pre-Eskolar 3,971 husi Públiku 1,974 no privadu 2,024, EBC 45.291, Publiku 38,478 no Privadu 6.813, ho Orsamentu ho montante $3.393,166.56.
Iha fatin hanesan, Diretora Saude Munisípiu Dili Agostinha Segurado mós hateten,, Papel saúde nian nafatin husu ba Edukasaun atu nafatin servisu hamutuk nune’e bele implementa Programa Merenda Eskolar nian ba estudante sira ho di’ak.
“Ami nia responsabilidade atu bele kontrola iha fornesimentu ai-han tuir tabela nutrisaun nian ne’ebé bele fó nutriente di’ak ba ita-nia estudante sira, no kontrola ba iha seguru ai-han sira liuliu ba preparasaun antes oferese ba estudante sira, tanba ne’e mak saúde nia prezensa pontus atu bele funsiona ho di’ak iha implementasaun liuliu ekipa Jestaun Merenda Eskolar nian.”Diretóra Saude Munisípiu Dili Agostinha Segurado.
Diretóra ne’e esplika, maski ohin sira haree liu ba oinsá jestaun husi Jestor Programa Merenda Eskolar nian implementasaun sira iha Dili atu bele prienxe kualidade ne’ebé rekomendasaun husi saúde nian.
” Iha parte Nutrisaun nian ne’ebé sira prepara nutriente di’ak atu bele proteje estudante sira bele hetan nutriente di’ak hodi bele forma ema ida ne’ebé ho saúde saudavel hodi susesu iha futuru.”Nia subliña.
Nune’e Diretora EBC Fatumeta Fernanda C. Belo mós hatutan, Sira preokupa tebes iha tinan Ida ne’e merenda eskolár la’o tarde tebes, maibé Sira esforsu to’o ohin loron bele realiza duni merenda eskolár ba períodu dahuluk nian.
“Maske implementa tarde, maibé ami agradese tebes ba Edukasaun Munisípiu ho nia esforsu tomak ohin loron ita bele lansa programa Merenda Eskolar ida ne’e, hodi implementa ona ba ita-nia estudante sira, atu nune’e bele fó saudavel nafatin ba ita-nia estudante sira. “Diretora EBC Fatumeta Fernanda C. Belo.
Enkuantu EBC Fatumeta kompostu husi eskola Filial 3 mak hanesan Ensinu Baziku Filial (EBF) Fatumeta, Ensinu Baziku Filial (EBF) Naroman no Ensinu Baziku Filial (EBF) Bairru-pite tanba ne’e estudante iha eskola EBC Fatumeta hamutuk 4.000 míl.
Jornalista : Delfina Borges
Editór : Orlando Magno
