(Dili) Mudansa – Jornalista labele marka pasu iha fatin de’it ho 5W+1H maibé bele komprende oinsá atu hato’o reportajen ba asuntu sira ne’ebé sensivel.
Asuntu ne’e hato’o husi, Reprezentante Konsellu Imprensa (CI sigla portugés) Konselleiru Amito Araujo Ohin ensera formasaun ba jornalista sira ho tema Seguransa Protesaun ba komunikasaun Digital neebe organiza husi Asosiasaun Jornalista Timor-Leste (AJTL), iha Radiu liberdade Hudi laran Dili, sábadu, 01/04/2023.
Amito Araujo hateten, Espera membru na’in rua hetan formasaun iha Malaysia bele mai transforma ba jornalista sira ne’e hanesan espasu di’ak ida fiar katak formandu sira agora sai formadór hodi fasilita fali formasaun ba kolega sira ne’ebé seidauk hetan oportunidade,
“Esperensia ne’ebé ita hetan iha mundu jornalizmu bele fahe, jornalista labele marka pasu iha fatin de’it ho 5W+1H maibé bele komprende oinsá atu hato’o reportajen ba asuntu sira ne’ebé sensivel no Jornalista sira ne’ebé inklina an iha AJTL ita la hanesan ho asosiasaun sira seluk tanba ita maka bele fasilita ba malu ho buat ne’ebé ita komprende no hetan iha rai laran iha mós rai li’ur,” Konselleiru Amito afirma.
Amito husu vontade Asosiasaun ne’e nian labele para iha ne’e deit, maibé kontinua nafatin ho asuntu sira seluk relevante ho servisu jornalizmu nian, Espera AJTL sei susesu diak liu no AJTL sei la hanesan Asosiasaun sira seluk tinan ida halo dala ida.
AJTL kontinua promove nafatin liberdade Imprensa no Liberdade Espresaun kapasitasaun ne’e importante, depois eleisaun ka iha periodu kampañia ida ne’e nia laran fo formasaun liu-liu kona ba Reportagen ba Politika nune’e membru sira lalika kontra ka ses husi Kode Étika no Lei komunikasaun Sosial.
“ita nia ezistensia independensia ne’e mantein nafatin, maske kritika barak importante mak lalika ses hosi kode Étika no CI apoiu programa hotu Asosiasaun sira halo ba jornalista sira nia produtividade susesu ba ita no ba media Timor-Leste.”nia sublina.
Iha fatin hanesan Prezidente AJTL Zevonia Viera mós hateten, AJTL fo formasaun la’os tekniku jornalizmu maibé siensia sira ne’ebé la’os jornalizmu nian mós jornlista presiza aprende atu haforsa kbiit jornalista ne’e hanesan komitmentu AJTL fo ba nia mebru sira atu hasa’e kapasidade iha área jornalista nian.
“Parabens ba kolega sira hotu uza ona Signal no keepassXC bele rai ita boot sira nia data no obrigada barak ba alin na’in rua tuir formasaun iha Malaysia mai sai fasilitadór ba kolega sira, ita boot sira mós sai fasilitadór iha aban bain rua AJTL organiza hili ita boot sira sai formadór ba kolega sira seluk, formadór la’os estrutura AJTL de’it, maibé membru ne’ebé iha kapasidade ami prontu organiza imi sai formadór agradese dala ida tan aluta kontinua.” Dehan Prezidente AJTL
Iha sorin seluk formadór Adroaldo de Aleima mós hatutan, Formasaun ida ne’e servisu hamutuk ne’ebé AJTL halo ho Internews, AJTL nia membru na’in rua hetan oportunidade ba aplika pasa no ba tuir formasaun iha Malaysia kona ba Seguransa Protesaun ba komunikasaun Digital.
“Objetivu husi treinamentu ida ne’e mak oinsá jornalista sira bele komprende saida maka seguransa Digital, asegura ita nian an, hala’o atividade liu hosi online iha Timor-Leste halo atividade online haruka husi facebook, email hala’o atividade sira ne’e katak ita-nia data la seguru, tanba kompañia mós akompaña entaun ita-nia data sira ne’e asegura liu husi tools ka fermentu ne’ebé ita uza ba ema ne’ebé haruka mensajen no simu mensajen de’it maka hatene.”Dehan Formador Adroaldo de Aleima.
Reprezentante formandu Adelina X. Menezes mós subliña, nia parte sente apresia tanba durante loron rua formandu tuir formasaun iha ne’e aprende buat foun barak.
“Agradese ba AJTL bele haruka nia membru sira ba tuir formasaun iha rai li’ur hodi bele fahe tutan mai ami no buat ne’ebé ami hetan sei la hotu iha ne’e de’it, maibé sei fahe ba kolega sira seluk ne’ebé seidauk hatene, asegura protesaun ba komunikasaun Digital hanesan buat foun ida mai ami,” nia apresia.
Formasaun ne’e partisipante sira husi média Eletronika, Televisaun, Radiu no Online sira mak hanesan, Media Mudansa, GMN, Media Esperansa,Neon-Metin, Loluwari, Lafaek New,Sapnews, Radiu Luberdade no Radiu RKDL no formasaun ne’e durante loron rua.
Jornalista : Delfina Borges
Editór : Orlando Magno
