(Ermera) Mudansa – Partidu Socialista de Timor (PST), ho númeru Sorteu 15, halo Abertura mini kampaña iha Munusipiu Ermera kapitál Greno, no fó mós tomada da pose ba koordenadór sira hodi hametin estrutura partidu nian iha baze, atu hakat ba Elisaun Parlamentar (ELPAR).
Iha kampaña ne’e PST aprezenta programa 3 hanesan Subsidi ba agrikultura, Moderniza agrikultura no fó saham ka asaun ba traballadór sira.
” PST hakarak abertura nia kampaña iha Munisipiu Ermera, tanba povu Ermera maioria moris agrikultura, PST hakarak moderniza setór agrikultura, fó subsídiu ba inan aman sira, tanba iha Munisipiu Ermera povu maioria hola parte iha vida agrikultura,” dehan Prezidente PST, Avelino Coilho bainhira halo abertura ba Mini kampaña PST iha Munisipiu Ermera, Kuarta (19/04/2023).
Nia afirma, atu sai agrikultura tenke iha rai, tanba ne’e atu dehan ba povu Ermera katak, rai ne’e la’ós estadu nian maibé povu nian.
Povu mak iha Direitu atu halo to’os kuda netik buat ruma ho ida ne’e PST hetan pozisaun maka sei husu atu asumi knaar iha Ministeriu agrikultura, nune’e bele tau matan di’ak liu tan povu agrikultura sira.
“Moderniza povu atu badinas prodús produtu iha setór agrikultór, tanba Ermera koñesidu ho produsaun kafé, la’ós kafé de’it maibé Ermera riku tebes ho produtu sira seluk, tanba ne’e presiza dezenvolve no halo modernizasaun,” nia reforsa.
Observasaun Jornalista Media mudansa nian iha terenu hare katak, Mini kampaña ne’e hetan observasaun husi CNE, STAE, Sosiedade Sivil, no seguransa másimu husi Polisia Nasional Timor Leste (PNTL).
Jornalista : Esperança Monteiro Soares
Editór : Orlando Magno
