PN Komemora Loron DFU Ba Tinan Ida Iha TL

banner 120x600

(Dili) Mudansa – Parlamentu Nasionál (PN) Komemora adezasaun Timor-Leste nian ba Deklarasaun Fraternidade Umana (DFU) ne’ebé ohin loron (25/04/2023) kompleta ona tinan ida inklui no mós lansa Koletánea kona-ba Fraternidade Umana iha Timor-Leste.

Durante iha prosesu komemorasaun ne’e, Prezidente PN Aniceto Longuinhos Guterres Lopes husu públiku atu konsidera nafatin elementu ne’ebé konstitui fraternidade umana nian, no mós fó hanoin ba partidu polítiku sira no povu tomak atu manifesta mós vontade polítika partidária ho espíritu fraternal hodi asegura eleisaun ne’ebé livre, justu, demokrátiku no la’o ho dame.

“Serimonia ida ne’e ha’u hakarak tatoli ba públiku atu konsidera nafatin elementu sira ne’ebé konstitui manifestasaun reál fraternidade umana no konvivênsia iha dame laran iha prosesu polítiku demokrátiku ne’ebé oras ne’e ita hala’o hela to’o forma kompozisaun polítika foun iha Parlamentu Nasional no forma Governu foun,”dehan Aniceto iha Parlamentu Nasionál, tersa 25/04/2023.

Tanba tuir nia, fulan ida ne’e ho fulan maiu, povu tomak sei hasoru ambiente ne’ebé teste mós vontade polítika no espíritu fraternal, tanba ne’e tempu to’o ona atu partidu polítiku sira tatoli sá mak sei halo bainhira kaer ukun hodi lori povu tomak ba moris di’ak.

Nia hatutan, iha prosesu demokrátiku no lansamentu Coletânea Fraternidade Humana ida ne’e, nu’udar Prezidente PN reafirma katak Timor-Leste nia pioneiros ba liberdade no independénsia ba sidadaun hotu-hotu, mehi ne’ebé nakonu ho espíritu fraternidade umana moris nanis ona iha relasaun sosiál no umana.

Nune’e nia haktuir, presizamente estadu  reajusta no reorienta dezenvolvimentu nasionál ho urjente, tuir espíritu ne’ebé temi iha Preambulo CRDTL katak, inisiál da citação “harii sosiedade ida ne’ebé moris iha dame no justisa, prosperu, no nakonu ho solidariedade no fraternidade.

Portantu iha serimónia komemorasaun ne’e hetan partisipa direita husi Prezidente Repúblika, Jose Ramos Horta, Reprezentante Primeiru Ministru Fidelis Leite Magalhães no Membru Governu sira, deputadu, PDHJ, Prezidenti Tribunal Rekursu, Dr Deolindo dos Santos, Juíz Konselleiru, Arcebispo Virgílio Cardeal do Carmo da Silva, SDB, inklui mós konvidadu sira seluk

Jornalista: Julião da Silva

Editór      : Orlando Magno

banner 325x300