(Dili) Mudansa – Negosiante Ambulante Isac Ruas da Costa hakotu estudu Universidade Dili (UNDIL), tanba menus ekonomia no finanseiru husi família uma laran no mós la iha ema ida atu suporta ninia estudu tanba ne’e Isac deside hakotu nia estudu kontinua halo negósiu fa’an nuu iha Estrada ninin.
Isac Ruas da Costa orijen Husi Aldeia Kai-oa suku Ossu Desima Postu Administrativu Ossu Munisipiu Viqueque.
Negosiante Isac Ruas da Costa informa, nia hala’o negósiu Ida ne’e tanba uluk sei eskola iha UNDIL, osan laiha atu selu semester hodi kontinua eskola, tanba ne’e mak agora Isac hakarak fa’an de’it nuu iha sidade Dili.
“Ha’u nia família moris simples kbiit la to’o atu suporta ha’u-nia estudu tanba ne’e mak ha’u deside hapara eskola kontinua buka osan liu husi fa’an nuu,” dehan Isac ba Jornalista Mudansa iha Largo Lesidere Dili, kuarta 13/04/2023.
Nia afirma, to’o semester III Isac hapara Nia estudu Iha Universidade Dili (UNDIL) Fakuldade Ekonomia Departamentu Akontabidade.
“Husi negósiu ne’e bele responde no fasilita ha’u-nia presiza sira liuliu ba nesesidade uma laran, maibé nuu ne’ebé ha’u fa’an ne’e sosa tutan de’it husi munisípiu Lautem, Baucau, Manufahi, Likisa, ho presu nuu fuan ida $.0,50 no ha’u fa’an fali ida $.1.00,” nia deklara.
Isac relata, Difikuldade boot ne’ebé Nia hasoru hanesan Governu Liu Husi guarda Munisipiu hodi halo asaun Ida ne’ebé la satisfás ho Negosiante Sira Nia hakarak.
“Ami ba Sosa mak mai fa’an fali, la’ós ami ba husu de’it, tanba ne’e governu mós tenke hanoin ho buat sira hanesan mak bele hatudu asaun oioin ba negosiante sira,” Isac lamenta.
Nia deklara, governu la prepara fatin ba negosiante nuu sira atu fa’an iha merkadu laran, maibé iha Dili ne’e merkadu mak Manleu no merkadu Taibesi de’it, fatin rua ne’e la sufisiente ba negosiante sira, tanba númeru negosiante iha Dili laran aumenta ba beibeik ne’ebé governu presiza kria tan merkadu ida ba negosiante sira.
“Hau rekomendasaun ba Ukun na’in sira liuliu Parte relevante ne’ebé toma konta ba asuntu ne’e, tenke kria Fatin ne’ebé seguru ba Ami Negosiante Sira nune’e Ami bele Hala’o negósiu karik bele hakmatek iha Fatin,” nia sujere.
Estajiadu : Zemidonio Martins
Editór : Orlando Magno
