Dili) Mudansa – Emprezaria Zenilda Soares do Rego iha inisiativa rasik halo negósiu kada loron hetan osan $.100.00 hodi haforsa nesesidade uma laran liu husi grupu ne’ebé nia rasik harii ho naran Sadi Milanes.
Zenilda Soares do Rego nu’udar foin-sa’e ida ho idade 23 orijen husi munisípiu Baukau dadaun hela iha Mercado Komoro, halo negósiu Es Kelapa ho Es Teler iha tasi ibun Farol hodi ajuda alin nian rua nia estudu no mós selu uma aluga ne’ebé dadaun ne’e sira hela ba balu fó ba inan aman sira uza.
Nia informa negósiu ho naran Sadi Milanes fa’an produtu iha modelu rua mak hanesan, Es kelapa $.2.00.00 Es no Teler $1.00.00 husi negósiu ne’e kada loron nia hetan rendimentu kuaze osan $ 100.00 ida resin.
“Ha’u halo negósiu iha ne’e foin mak semana rua, maibé Kada loron ida ha’u hetan fundus $ 100.00 menus liu mak $.60.00, osan ne’ebé ha’u hetan husi negósiu ne’e selu uma aluga no selu alin nia eskola, tanba alin mane eskola iha iha UNTL, alin feto eskola iha STM,” dehan Zenilda ba Média Mudansa iha tasi ibun Faról Dili, kuarta 12/04/2023.
Nia esplika, ho razaun hili naran negósiu Sadi Milanes ne’e tanba rona motivasaun husi tiu ho tia inklui pai ho maen sira na’in haat nia naran hodi habadak tau hamutuk ikus mai ho naran Sadi Milanes
“Sadi Milanes, sadi signifika ha’u nia tiu ho tia nia naran Santiago ho Dilita Milanes ha’u nia pai ho maen nia naran ha’u nia maen naran Emilia ha’u foti Mila de’it, ha’u nia pai naran Yohanes foti naran ikus Anes ema Suai. ho razaun ida ne’e mak ha’u foti naran negósiu Sadi Milanes ha’u nia maen ema Baucao,” nia hatutan.
Inisiativa husi negósiu ne’e Zenilda motiva nia an, orsamentu ne’ebé nia hetan husi brigada ambientál mak tau hamutuk hodi loke rasik negósiu ho fundus $.700.00 resin.
“Orsamentu ne’ebé ha’u uza hodi halo negósiu ne’e mai husi ha’u nia esforsu rasik, tanba iha momentu ida ha’u nia pai ho maen no mós tiu ho tia, motiva ha’u oinsá atu halo atividade negósiu ho hanoin hirak ne’e mak ha’u rai osan hamutuk to’o $. 700.00 mak hodi halo negósiu ne’e,” nia deklara.
Zenilda konta, antes atu loke negósiu nia mós envolve an iha brigada ambientál nune’e Zenilda loke negósiu ne’e la’ós de’it buka rendimentu maibé sira mós kria jardín iha tasi ibun Farol ikus mai ema barak mak ba vizita.
“Iha fulan outubru tinan kotuk ha’u ata rasik envolve an iha Brigada Ambiental nune’e ami mak kria duni jardín ida ami halo kadeira uza roda ema barak mak mai vizita iha fatin ida ne’e entaun ha’u hasoru Diretora domenika hodi loke negósiu fa’an es kelapa ho es teller,” nia hakotu.
Jornalista : Honorio Guteres/Elizio Noronha
Editór : Orlando Magno
