(DILI) Mudansa – Liu husi serimónia funebre saudozu Manuel de Castro Pereira “SACA” iha Jardin dos Herois da Patria Metinaru (JHPM), reprezentante husi família Afonso Ribeiro agradese ba estadu liuliu Prezidente da Republika Demokratika de Timor-Leste ne’ebé bele simu pedidu, dekreta hodi autoriza saudozu bele hetan fatin deskansa ikus iha Metinaru.
“Agradese ba Prezidente da Republika ne’ebé bele simu ami nia pedidu, dekreta hodi autoriza saudozu Manuel de Castro Pereira bele mai hetan fatin deskansa ikus iha Jardin dos herois da Patria Metinaro”, tenik reprezentante família saudozu Manuel Castro Pereira iha JHPM, kuarta 12/04/2023.
Nia Hato’o mós agradesimentu ba parlamentu nasionál ne’ebé ohin halo sira nia sesaun solene hodi fó omenajen ikus ba saudozu Saca tanba nia mós sai hanesan antigu deputadu iha lejislatura datoluk husi 2012-2017 iha Parlamentu nasionál.
“Agradese mós ba oitavu governu konstitusionál liuliu ministériu saúde, ministériu solidariedade sosiál no ministériu antigus kombatentes da libertasaun nasionál ne’ebé esforsu hodi transporta saudozu hosi rai laran ba rai liur hodi halo tratamentu saúde dala rua maibé la konsege salva nia vida,” nia apresia.
Agradese mós ba forsa defeza ne’ebé ohin bele akompaña militarmente bele hakoi saudozu Manuel de Castro Pereira “SACA” iha fatin sagradu ida ne’e tuir Sistema militár nian.
Tuir mai agradese mós parte igreja nian, padre na’in rua ne’ebé ohin mai fó bénsaun ba saudozu nia isin mate no ba rai kuak hanesan nia uma ka fatin deskansa ikus nian no ba Madre Candida ne’ebé dirije orasaun hahu hosi CCF no mai fatin ida ne’e.
Iha sorin seluk, Padre Rolando Fernandes SDB hatete, Saudozu Manuel de Castro Pereira “Saca” nu’udar ninia estudante iha tinan 40 liubá. Sente saudozu hanesan nia oan rasik, tanba besik tebes família salezianu Dom Bosco.
“Ha’u lori família salezianu tomak nia naran hato’o sentidu pésames no ami nia orasaun ne’ebé ami halo ona iha loron sira ne’e sei kontinua ba nafatin,” dehan Amo Rolando
Nia deklara, Agaradese ba Saudozu tanba nia moris tomak ajuda salezianu sira no husu Saudozu ne’ebé agora dadaun besik ona Na’i Jesus, Favór ida keta haluha ko’alia ba Jesus kona ba nasaun boot ida ne’e. Maski rai ki’is maibé boot iha Espiritu, reza nafatin atu nasaun ne’e sei dezenvolve liután no sei hetan grasa di’ak liután.
“Ita rasik mós terus ba rai ida ne’e iha tempu ne’ebá. Ita-nia foin-sa’e sira, ita-nia oan sira atu bele hetan dame. Tanba ne’e ami husu ita boot, ita ne’ebé besik ona Jesus agora, ko’alia nafatin ba Jesus ba Rai Timor-Leste nia di’ak,” hakotu nia
Aleinde ne’e, entrega dekretu do prezidente da Republika Demokratika de Timor-Leste hosi reprezentante konsellus Kombatentes da Libertasaun Nasionál Costodio Belo “Alin Laek” ba saudozu Maunel de Castro Pereira “SACA” nia oan feto Jorzihna Manuel Freitas de Castro no entrega Bandeira nasionál hosi Estadu Timor-Leste ba família Saudozu.
Tuir observasaun jornalista nia katak, bainhira Saudozu nia urna tama Jardin dos Herois da Patria hetan simu hosi parada dramben kulturál hodi marsa hale’u urna dala hitu hafoin muda nia fatin hakmatek ikus.
Jornalista : Ekipa MD
Editór : Orlando Magno