(Dili) Mudansa – Komite Sentrál FRETILIN (CCF-sigla portugés) ohin hato’o últimu omenajen ba Saudozu Manuel de Castro Pereira “SACA” iha nia rezidénsia CCF Fatuhada Dili hafoin ba hakoi iha Jardin dos Herois da Patria Metinaro.
Sekretáriu Jerál FRETILIN Mari Bin Amude Alkatiri iha nia intervensaun hatete, Nia hatene Saudozu Manuel de Castro Pereira hosi nia maun Ali Alkatiri, hosi ne’e mak komesa koñese saudozu. Hanesan militante ida no kuadru ida iha partidu FRETILIN ne’ebe tenke istima.
Nia istória hosi ki’ik to’o boot partisipa periode tinan tolu iha baze de apoiu, tun mai área okupadu no nunka para ho idade ki’ik maibé partisipa iha luta.
“Tanba ne’e Kamarada Manuel de Castro Pereira hanesan ezemplu kuadru ida ne’ebé ita tenke estima no komprende, Ita labele fó importánsia ba karakter ema ida-idak nian, maibé tenke buka fó importánsia ba nia partisipasaun iha prosesu da luta,” dehan Sekretariu Jerál FRETILIN Mari Alkatiri iha serimónia presta omenajen iha CCF Fatuhada Dili, Kuarta (12/04/2023)
Saudozu Manuel de Castro Pereira, ema ida ne’ebé ko’alia direta, la subar nia deskontentamentu maibé la subar mós nia domin ba rai ida ne’e no ba povu ida ne’e liuliu ba FRETILIN, Tanba ne’e ezemplu ida ne’ebé baibain dehan sira nia memória mak sei halo istória.
“Saudozu Saca sei ba Jardin Herois da Patria, iha ne’ebá nia memória sei buras ba ita hotu, hanesan ezemplu atu ita halo tuir,” nia afirma.
Ba família hotu ha’u bele dehan orgullu boot bele hetan aman ida, tiu ida, avoo ida ne’ebé bele sai ezemplu no referénsia ba família boot FRETILIN hanesan, kuadru ida ne’ebé ho nia vontade tomak hodi halo FRETILIN sai forte no buras ba beibeik.
“Nia husik ita iha momentu ida ne’ebé determinante tebes, desizivu tebes, momentu ida ke ita loke pájina foun ba ita-nia vida tomak iha Timor-Leste. Ita atu loke pájina foun tanba FRETILIN fila hikas ba nia abut, ba nia povu atu nani hamutuk ho nia povu ba naroman,” nia deklara.
Saudozu Manuel de Castro simu misaun ida atu ba buka naroman iha lalehan, loke dalan ba naroman. Ida ne’e lutu ba ema hotu sente, Saudozu Manuel de Castro Pereira nia di’ak mak barak liu duke nia aat.
Hafoin remata presta omenajen Sekreariu Jeral Partidu FREILIN Mari Bin Amude Alkateri entrega Bandeira FRETILIN ba Saudozu nia oan mane boot depois parte CCF entrega hikas saudozu Saca ba nia família hodi kontinua prosesu funerariu tuir kultura.
Jornalista : Ekipa MD
Editór : Orlando Magno
