(Dili) Mudansa – Ohin 12/04/2023 Parlamentu Nasionál (PN) presta omenajen ikus ba urna Saudozu Manuel de Castro Pereira “Saca” iha uma fukun Parlamentu Nasionál.
Iha serimónia Votu apezar ne’ebé dirije hosi Prezidente Parlamentu Nasionál (PN) Aniceo Guteres fó oportunidade ba bankada partidu sira hodi hato’o liafuan ikus ba Saudozu no sentidu kondolénsia ba família en lutada.
Bankada CNRT ne’ebé reprezenta hosi deputadu Duarte Nunes hatete, saudozu Manuel de Castro Pereira nu’udar maun-alin no amigu di’ak, maski adversáriu iha polítika maibé kolega di’ak, no nia husik memória barak iha períodu lejislatura datoluk, maibé buat ne’ebé nia kontribui, hela de’it memória.
“Lori bankada CNRT nia naran, fó solidariedade no sentidu kondolénsia ba família enlutada no ba partidu FRETILIN ne’ebé nia husik, Fiar katak, Oras ne’e dadaun saudozu nia klamar iha ona Na’I Maromak nia kadunan santa,” dehan Xefe Bankada CNRT liuhosi serimónia presta omenajen ikus iha Parlamentu Nasionál, Kurta, (12/04/2023).
Reprezenta Depudadu bankada FRETILIN David Dias Ximenes dadolin, dala ida tan, momentu ida tan iha fatin ida ne’e, deputadu/a, funsionáriu no asesoris iha parlamentu ida ne’e. Ho laran taridu, matan-been no neon sala, simu urna ema ida ne’ebé iha tempu balun mai tuur iha ne’e nu’udar matan dalan povu nian.
Iha fatin ida ne’e nia tuur hodi ko’alia no haksesuk kona ba povu nia hanoin no nia moris. Urna ida ne’e, urna husi maun-alin kamarada, nasionalista no patriota Mauel de Castro Pereira “Saca” nian.
Nia la iha duni ona, nia hakotu duni ona maibé nu’udar ema nia moris mós portasores ba vertudes no frakezas tanba ne’e husik ba nia mak lori frakeza sira ne’e no husik hela mai ita-nia vertudes hodi ita banati tuir.
“Saudozu Manuel de Castro nu’udar deputadu hamosu nia hanoin hodi nia hakarak, konforme estratéjia partidu nian, iha fatin ida ne’e fatin haksesuk malu nian, fatin diskute malu nian hodi buka dalan ba ita-nia povu,” Depuadu David Dias deklara.
Manuel de Castro Pereira sempre hatene saida mak haksesuk polítika no hatene Timor-oan, halo destinasaun kona-ba polítika no amizade pesoais, Saudozu ema ne’ebé hatene halimar no ibun boot maibé ibun midar, nia hatene pozisiona nia an oinsá lori ema nia laran no ema nia neon, atu haree sa mak sala no sá mak loos.
Iha fatin ne’ebé de’it nia sempre hatudu nia umorismu maibé hosi umorismu ida ne’e nia konvense ema seluk hodi tuir nia hanoin.
Matebian husik hela nia rekordasoes no lembransas iha Parlamentu ida ne’e, hosi nia konvive, determinasaun no responsabilidade halo ema seluk sei la haluha nia.
“Representa bankada FRETILIN, hato’o sentidu kondolénsia ba família enlutada, liuliu ba faluk no oan kiak sira. Moris ne’e nakonu ironiku. Ita presiza triste atu ita koñese felisidade, ita presiza haklalak atu ita apresia hakmatek,” David relata.
Bankada PD reprezenta hosi Antonio da Conceicão “Kalohan” hatete, ohin halibur malu iha sesaun estraordináriu ida ne’e atu fó omenajen ikus ba maun-alin ida ne’ebé nia dedikasaun ba rai ida ne’e no presta nia servisu ba nasaun liuhosi uma fukun ida ne’e.
Ohin Saudozu Saca nia isin hatoba iha fatin ida ne’e la iha ona vida maibé memória hotu ne’ebé tau ba ba povu nia moris mak lembransa ida ne’e nia husik ba ida-idak atu banati tuir hodi kontinua fó kontribuisaun serví povu no rai ida ne’e.
“Ho bankada PD nia naran hato’o sentidu kondolénsia ba família ne’ebé mak maun-alin Manuel de Castro Pereira husik hela no ba partidu FRETITIN hanesan mós instituisaun ne’ebé Maun-alin serví ba hodi bele realiza nia mehi ba rai ida ne’e,” Antonio da Conceicão afirma.
Tuir observasaun Jornalista iha terenu katak, Saudozu to’o Mai iha Uma fukun Parlamentu Nasionál (PN) 10:10 am no hein iha li’ur kuaze minutu rua nulu (20) hafoin simu hosi parada polísia Nasionál BOP (Batellaun Orden Públiku) no akompaña to’o ba Parlamnetu nia laran.
Parlamentu Nasionál (PN) dirije sesaun estraordináriu ho Votu 32, kontra 0 no abstensaun 0 hodi simu Saudozu nia isin mate no fó últimu omenajen ba urna saudozu Manuel de Castro Pereira “SACA”.
Jornalista : Ekipa MD
Editór : Orlando Magno
