(Dili) Mudansa – Faluk Maria Lopes idade 67, moris mesak durante tinan 20 resin ona iha Bairo Metin IV suku Komoro, Postu administrativu Dom Aleixo munisípiu Dili, ne’ebé moris depende de’it ba lata mamuk maski terseira idade ona maibé to’o agora seidauk hetan osan idozu ne’ebé governu fahe ba ema tinan boot sira.
Maski hetan diskriminasaun husi governu maibé feto faluk Maria Moris la depende no tane liman ba ema seluk tanba uza rasik kbiit ne’ebé iha hodi resposta ba preokupasaun hotu no forsa hodi hasoru dezafiu oioin ne’ebé mosu iha ninia moris loroloron.
Maria informa, iha krize 2006 nia kaben mate husik hela faluk mesak, tanba Faluk Maria la iha oan no família ruma atu tau matan ba nia aat liu tan maka Faluk Maria seidauk hetan nia direitu husi governu hanesan ema sira seluk ne’ebé maka kuda fulan 6 sempre hetan osan idozu husi estudu.
“Hau hela mesak iha ne’e kleur ona, maibé la iha ema ida tau matan ba ha’u, tanba ha’u la iha oan no Familia rasik agora ha’u hela mesak, moris depende liu ba lata mamuk ne’ebé ha’u halibur depois fa’an fali mak sosa foos no modo, aleinde ne’e to’o agora ha’u seidauk simu osan idozu hanesan maluk sira seluk,” dehan Faluk Maria ba Media Mudansa iha Komoro Dili, kuarta 12/04/2023.
Nia afirma, atividade loroloron ne’ebé nia halo maka hili lata, hale’u kapitál Dili hahú husi dadeer to’o kalan maka foin fila ba uma, no lata ne’ebé maka nia hili, rai hamutuk hodi fó ba ema ne’ebé tetu kaleen mamuk hodi hetan fali osan sustenta ba nia nesesidade loroloron.
“Sai husi uma ba hili lata mamuk iha Dili laran sira, lori fila mai uma ha’u rai hamutuk, depois tuku tiha maka ha’u fa’an fali tanba ida ne’e mak ha’u-nia servisu loroloron, se ha’u la halo hanesan ne’e se mak atu hola foos ba ita han,” nia esplika.
Faluk ne’e relata, to’o agora nia parte seidauk iha ema ida tau matan ba nia, tan ne’e nia husu ba governu karik bele harii fatin dignu ida ba nia, tanba uma ne’ebé nia hela besik liu estrada Ibun maibé kondisaun la favoravel atu hela tanba kondisaun uma ladún di’ak.
“Uluk kedas ha’u hela iha ne’e, maski ha’u-nia idade ferik ona maibé ha’u seidauk hetan ajuda husi ema ruma, inklui governu, osan ne’ebé ha’u sosa hahán ne’e, mai husi lata mamuk ne’ebé ha’u halibur maibé husu governu se bele harii uma ida ba ha’u hela tanba uma ida agora ha’u hela ne’e kondisaun la di’ak ona,” nia rekomenda.
Tuir observasaun ne’ebé Jornalista média mudansa halo iha faluk Maria nia hela fatin nota katak, uma ne’ebé Faluk Maria hela no hamahon an kondisaun uma nia la sufisiente tanba uma laran kloot no didin de’it ho kaleen maibé iha kaleen balu hahú dodok ba daudauk ona.
Estajiada : Remizia Locateli
Editór : Orlando Magno
