(Dili) Mudansa – Autoridade Protesaun Sivil (APC-sigla portugés) rekoñese vítima dezastre 1-2 janeiru 2023 iha munisípiu Vikeke uma kain 14 ne’ebé hetan estragus husi anin boot maibé to’o agora vítima sira seidauk hetan apoiu maski vítima balu husi munisípiu seluk hetan ona apoiu emerjénsia.
Asuntu ne’e fó sai bainhira APC halo Komferensia imprensa hodi fó sai dadus dezastre naturais iha rai laran husi loron 4 – 11 abríl 2023 ne’ebé sira rejistu uma hamutuk 28 mak hetan estragus.
Diretór Gabinete Relasaun Externa no Komunikasau Autoridade Protesaun Sivil , Anacleto Caetano informa, dezastre naturais ne’ebé akontese iha Munisipio Vikeke iha fulan janeiru foin lalais, APC foin mak rekolla dadus.
Anacleto afirma, uma ne’ebé hetan estragus husi anin boot iha Munisipio Vikeke hamutuk uma kain 14 kompostu husi postu Watulari suku Afaloikai aldeia Lena uma 4, aldeia Buibela uma 5, aldeia Kaitahu uma 3, aldeia Kailake uma 2, iha postu Vikeke suku Umawain karaik aldeia Guakae uma 1, maibé iha munisípiu akontesimentu ne’e mosu dezde iha fulan janeiru foin fó sai informasaun tanba APC foin hetan Dadus kompletu.
“Munisipio Vikeke seidauk hetan apoia emerjénsia tanba sei halo reverifikasaun ba uma hirak ne’ebé hetan estragus, maibé apoia emerjénsia ba Uma kain sira husi munisípiu seluk hetan ona apoiu emerjénsia hanesan ai-han no mós sasán sira seluk” dehan Anacleto ba jornalista iha APC Kaikoli Dili tersa, 11/04/2023.
Diretór Anacleto Caetano afirma, dezastre naturais, ne’ebé akontese foin lalais liu ba Uma kain 28 mak hetan estragus, husi anin Boot, rai halai, ahi han uma, hirak ne’e akontese iha munisípiu Hitu.
Munisípiu Bobonaro akontese Mota lori labarik Feto na’in tolu maibé ida konsege salva no Rua Lakon vida, Kovalima postu Maukatar suku Matai uma kain ida hetan estragus husi anin, munisípiu Lautem postu Lautem Tutuala aldeia Leti anin boot sobu komunidade nia uma ida.
Iha munisípiu Ainaro postu Ainaro vila suku Soru-kraik akontese anin boot sobu komunidade nia uma rua no iha munisípiu Dili suku Komoro aldeia 4 de setembru akontese ahi han komunidade nia uma ida no iha postu nai feto aldeia Lesidere ahi han komunidade nia uma ida.
Iha rae oan Oe-kusse suku Lelaufe aldeia Mahata akontese anin boot sobu komunidade nia uma iha Pub prizaun parte Makasar suku Taiboko aldeia Makelat akontese ahi han komunidade nia uma ida”
Nia esplika, Protesaun Sivíl nia ekipa sei tun fila fali ba fatin akontesimentu sira hodi halo verifikasaun atu hatuur uma hira ne’ebé tama iha kategoria iha direitu ba rekuperasaun ou lae?.
“Ha’u rekomenda ba komunidade sira katak, agora tempu udan no anin boot ba sira ne’ebé hela iha rai lolon tenke kuidadu ita an dala ruma rai monu bele estraga ita-nia vida uma inklui sasán sira iha uma laran”. nia sujere.
Estajiada : Isabel de Fatima
Editór : Orlando Magno
