(Dili) Mudansa – Prezidente Repúblika Demokratika Timor-Leste, José Ramos-Horta kontinua lolo liman kari domin apoiu sasán ho nesesidade báziku ba família boot Asosiasaun Halibur Difiensia Matan Timor-Leste (AHDMTL), iha Manleuana Dili, kinta, 14 Abril 2023.
Apoiu hirak ne’e oferese direita hosi Assesor Sosiedade Sivil Prezidensia Repúblika, Quintiliano Moniz Carvalho no Assesór Unidade Inkluzasaun Sosiál Prezidensia Repúblika, Gaspar Afonso.
Asesór Sosiedade Sivil Prezidensia Repúblika, Quintiliano Moniz Carvalho informa, apoiu ne’e nu’udar kontinuasaun hosi promesa Prezidente Ramos-Horta ne’ebé sai aman ba povu tomak no tulun família defisiénsia fíziku, matan, tilun no povu kbiit-laek ne’ebé moris susar no merese hetan tulun.
“Sasan ne’ebé ami lori mai mak hanesan SprigBed 10, Sumasu Mutin 10, Mina Bimoli litru 5 kaixa 5, Foos 25kg saka 20, Suprmie Sedap Kaixa 20, Deho Kaixa 1, Susuben Kaixa 4, Masimidar Kilograma 5 plástiku 9, Sabaun Kaixa 2, Rinso Kaixa 2 no Pastende Kaixa 2,” nia deklara.
Iha oportunidade ne’e, Manajer Programa AHDMTL, Luciano Borges hato’o agradese ba Na’I Maromak liu hosi apoiu ne’ebé oferese hosi PR Ramos-Horta.
“Onra no orgullu ba ami, bele simu apoiu hosi Na’I PR Ramos-Horta, tanba ami família defisiénsia matan kuaze 100 resin maka iha ne’e, ami agradese ba apoiu ne’ebé oferese mai ami, ami la haree ba nia kuantidade, maibé ami presiza ita hamutuk atu luta ba direitu defisiénsia sira nian no lori ami hotu partisipasaun iha dezenvolvimentu Timor-Leste,” nia agradese.
Nia dehan, durante ne’e apoiu hosi governu nian la’o paradu, tanba ne’e ho apoiu PR Ramos-Horta bele responde sira nia nesesidade.
Aleinde ne’e Assesór Asuntu Unidade Inkluzasaun Sosiál Prezidensia Repúblika, Gaspar Afonso dehan, apoiu nu’udar pasu importante husi domin PR Ramos-Horta nian.
“PR la’os vizita AHDMTL iha kampaña, maibé nia sempre oferese apoia ne’e kada fulan, mezmu tarde, maibé apoiu ne’e nia sempre oferese nafatin, tanba PR Horta hatene imi barak mai hosi munisípiu,” Gaspar relata.
Nia husu ba família AHDMTL atu kontinua mantein kalma no estuda beibeik hodi fó susesu ba ida-idak nia an.
“Prezidente dehan, se governu la tau osan, nia parte sei tau osan ba ita-nia dormitóriu, tanba ne’e ita tenke hein no kalma nafatin, tanba tempu besik ita-nia dormitóriu sei iha,” nia hatete.
Nia sujere, husu ba família ADMTL atu utiliza didi’ak toba fatin hirak ne’e ho di’ak nune’e bele dura ba tempu naruk.
Dadaun ne’e, membru AHDMTL hamutuk na’in 100, kompostu husi feto 53 no mane 47 mak hela iha edifísiu AHDMTL hodi kontinua tuir kursu oin-oin hasa’e sira nia koñesimentu no partisipa iha prosesu dezenvolvimentu sósiu-ekonómiku inklui polítika Timor-Leste.
Jornalista : Ekipa MD
Editór : Orlando Magno
