(Kovalima) Mudansa – Grupu Agrikultura Covalima Timor-Leste (GACTIL) eziste husi joven na’in 10 kompostu husi feto 4 mane na’in 6 iha munisípiu Kovalima, postu Zumalain, suku Zulo, ho objetivu atu haforsa ekonomia família no mós hamenus númeru dezempregu iha Timor.
Koordenadór Grupu ACTIL Brismo Gusmão informa, nu’udar joven harii grupu ne’e atu kria rasik kampu servisu hodi hetan rendimentu/osan hodi sustenta nesesidade loroloron no mós fasilita alin no oan sira nia eskola.
“Ami lakohi garantia ba governu tanba promesa balu sira la realiza hodi aumentu númeru dezempregu iha rai laran, ho ida ne’e Ami na’in 10 tuur hamutuk harii grupu kria rasik kampu servisu ba ami nia an hodi sustenta nesesidade família uma laran,” dehan Brismo ba Media Mudansa iha Zulo, Kovalima, segunda 17/04/2023.
Nia konta, atividade kona-ba grupu agrikultura ne’ebé sira hala’o mak hanesan, kuda modo, Hare no mós produtu lokál sira seluk depois ba fa’an iha merkadu hodi hetan netik osan uitoan hodi sosa saida mak sira nia grupu sei presiza no balu uza ba nesesidade loroloron.
“Grupu ne’e eziste iha tinan 2018 hahú ho Fundu $200.00 ne’ebé mai husi ami na’in 10 nia kontribuisaun kada ema ida hatama osan $.20.00, ho ida ne’e mak ami harii grupu ACTIL, ” nia deklara.
Tuir Planu Planu ba oin grupu ne’e iha mudansa sira hakarak halo rekrutamentu ba joven sira ne’ebé remata ona sira nia eskola sekundáriu karik sira la kontinua no mós seidauk iha servisu nune’e bele haforsa di’ak liu tan atividade ne’ebé mosu iha grupu ne’e nia laran.
“karik ami nia grupu ba oin mak rendimentu sa’e, entaun ami mós bele rekruta tan joven balu atu servisu hamutuk ho ami iha grupu ida ne’e, tanba ami mós iha planu ba oin atu hakiak animál hanesan fahi manu no seluk tan,” Brismo akresenta.
Nia rekomenda, husu ba joven sira hadook an husi krime no konflitu maibé tenke aprende ho ho pasiénsia sai ema ne’ebé potensiál tanba joven iha Timor seidauk tarde atu aprende iha área oioin nune’e labele tuur hateke de’it ba ema seluk nia susesu hodi haksolok hamutuk.
“Maluk foin-sa’e sira mai ita fó liman ba malu harii pás no estabilidade hodi kontribui dezenvolvimentu liuliu iha setór agrikultór nian hodi hamenus importasaun husi nasaun seluk,” nia sujere.
Jornalista : Ekipa MediaMudansa
Editór : Orlando Magno
