(Dili) Mudansa – Guarda Munisipiu Dili hala’o atividade limpeza jerál iha merkadu Taibessi hodi garante fatin moos maibé Negosiante sira la satisfeitu tanba sira nia sasán barak mak hetan estragus husi pesoal guarda municipal.
Negosiante Justina Mendonça informa, Guarda munisípiu sira bainhira atu mai limpeza tenke ho kalma, atu nune’e vendedores sira mós satisfás ho sira nia servisu tanba sasán balu ne’ebé sira fa’an hetan estragus.
“Sasan ne’ebé guarda Munisipal mai sobu ne’e rai iha ami nia meza ninin, sira bele ko’alia de’it mós ami komprende maibé sira mai baku, selok, estraga sasán, ida ne’e mak ami la simu tanba Estadu ukun atu hare ba povu ki’ik maski Estadu harii ona fatin merkadu ba ami, loos katak estadu harii seguransa atu asegura ami maibé tenke ho loloos.” Dehan Justina Ba Media Mudansa iha Taibesi Dili, Sexta 31/03/2023.
Nia informa, fatin ne’ebé iha merkadu Taibessi Governu harii ona ba vendedores no ai-leba sira maibe tenke halo balansu atu ema ne’ebé mai ikus tenke fa’an sasán iha kotuk labele ba tau fali iha fatin transporte atu nune’e labele dada vendedores sira hotu nia atensaun sai ba fa’an iha li’ur.
“Ami reklama tuir ema moris povu ai-leba nia direitu fatin Estadu harii ona ba ami hodi fa’an sasán ami ba fa’an iha karreta, motór nia fatin no trotoár leten mak la bele maibé ida ne’e ami fa’an iha merkadu laran, iha fatin ne’ebé Estadu fó maibe ami lakohi sira tun husi foho ka Munisipiu ne’e fa’an fali iha oin no ami iha kotuk fali ne’e ami lakohi,” Justina deklara.
Iha fatin hanesan, Negosiante Juvita da Costa Pereira informa, nia kontente ho servisu Guarda Munisipal Dili nian maibé nia la satisfás ho hahalok ne’ebé pesoal sira hatudu iha merkadu taibesi.
Tuir lolos Guarda Munisipiu, sira tenke hare ema sira ne’ebé fa’an sasán iha transporte fatin mak labele maibé ema ne’ebé fa’an sasán iha merkadu nee guarda munisipa labele hasai.
“Ha’u kontente maibé sira servisu la tuir regras tanba Vendedor sira ne’ebé fa’an iha li’ur no trotoár leten sira bele duni sai maibé ami sira iha laran ne’e Governu maka prepara fatin no ha’u la simu Governu halo fatin ba vendedores hetan palakaun ida de’it maibé oinsa ho ema neebe moris garantia deit ba negosiu,” nia afirma.
Hatan ba kestaun nee, Koordenadór Jestaun merkadu Taibessi Antonio Manuel de Arauju hateten, Ohin jestaun Merkadu realiza limpeza jerál iha Merkadu sentru Leste atu nune’e labele hamosu lixu barak iha fatin ne’e
Jestaun Merkadu Taibessi hala’o nia knaar hahú husi segunda to sesta hare liu ba vendedores sira ne’ebé durante fa’an sasán iha transporte nia para fatin no mós rekolla sasán sira ne’ebé durante ne’e sira la uza ona atu nune’e bele halo merkadu sai mós liu tan.
Limpeza ne’ebé mak agora realiza Servisu Jestaun Merkadu hamutuk ho Ekipa Patroliamentu sei kontinua to’o fatin ne’e mós iha ambiente nia laran no Vendedores mantein fa’an sasán iha sira nia fatin kompradór sira bele asesu ho livre iha merkadu laran
“Vendedor sira ne’ebé ami konsidera hela hodi fa’an sasán iha ne’e tanba sira hela ho ambiente ida ne’ebé mós karik lixu balu ita hare ne’ebá sira foti sai tiha depois ida ne’ebé prioridade liu ba sira uza halo negósiu ou sira na’in rasik tau fali iha nia fatin,” nia esplika.
Antonio relata, Limpeza jerál ne’ebé sira hala’o, bazeia ba Lei artigu 33/2008 kona-ba konsidera no respeita lei ne’ebé hatuur ona, tenke fa’an sasán tuir fatin Governu prepara ona, atu labele halo engarrafamentu ba dalan transporte nia no mós fó espasu ba ema hotu atu liu.
“Ami sempre forma vendedores sira ho regra no tuir Lei Nu.33/2008 artigu balun ko’alia mos katak ita tenke konsidera no respeita hodi tau Negosiante sira tuir fatin ne’ebe maka ita preparadu ona,”Katak nia
Estajiada : Remigia Locateli
Editor : Orlando Magno
