(Dili) Mudansa – Octaviano Tilo ho idade 13 husi Rejiaun Administrativu Espesial Oe-kuse Ambeno (RAEOA), deside para eskola nia mama buka osan atu bele sustenta nesesidade uma laran, maski idade sei natoon maibé situasaun mak obriga tanba Tamba Octaviano nia papa mate bainhira nia sei tinan 6.
Moris iha mundu ida ne’e sente la kompletu tanba lakon ona papa atu haree no responsabiliza ba nesesidade uma laran hetok aat liu halo ita laran moras bainhira haree no rona ema balu bolu nia papa no haku’ak iha ita-nia oin.
Bainhira lakon ona papa, moris hahú namlele tan mahon uma laran nia la iha ona atu satán inan ho oan sira husi dezafiu oioin, aleinde ne’e mós ita la hatene? ba se mak oan kiak ne’e atu bolu papa no mós se mak oan kiak ne’e atu sente papa nia haku’ak.
“Hau rasik maka deside hakarak para eskola hodi ajuda ha’u-nia mama atu bele hetan netik osan uitoan sustenta ba ami nia nesesidade uma laran,” Dehan Octaviano Tilo ba média mudansa iha Bidau Dili, kuarta 08/03/23.
Octaviano informa, bainhira dadeer-saan haree rai huun mutin Octaviano hahú prepara an no mós prepara produtu ne’ebé baibain nia fa’an hodi hein loro-matan nurak mosu atu fó roman ba ema hotu iha mundu ida ne’e.
Octaviano hahú ninia atividade negósiu husi tuku 08 to’o lokraik tuku 04 mak foin fila fali ba uma hodi deskansa netik maibé kontinua hanoin sá mak nia atu halo iha loron aban.
“Ha’u tenke ajuda ha’u-nia mama fa’an haas tanba ha’u lakohi mama mesak mak buka osan hodi sustenta nesesidade uma laran no selu biin ho maun nia eskola entaun hakarak ka lakohi ha’u tenke ajuda mama hodi hakmaan mama nia esforsu ba ami oan sira,” oan kiak ne’e deklara ho laran triste.
Atividade ne’ebé Octaviano hala’o la’ós nia mama maka obriga maibé liu husi ninia sentimentu sosiál mak nia rasik hakarak fa’an han hodi ajuda nia inan faluk.
Octaviano iha maun alin ne’ebé nia papa mama ko’us hamutuk na’in tolu no mós iha família uma laran Octaviano hanesan oan ba da ikus maibé dadaun ne’e sira hela ketaketak tanba Octaviano nia maun ho biin hela iha Oe–kuse hodi hala’o estudu no mós Octaviano ho nia mama hela iha Dili hafoin sira nia papa husik sira iha tinan 2017.
Estajiadu : Jeronimo Freitas
Editór : Orlando Magno