(Dili) Mudansa – Negosiante Ivo da Quinha Magno deside nia an halo negósiu fa’an sigarru iha sidade Dili hodi ajuda inan-aman no maun-alin sira ne’ebé dadaun ne’e hala’o hela sira nia estudu.
Negosiante Ivo da Quinha Magno informa, hala’o negósiu fa’an sigarru ne’e seidauk to’o fulan maibé iha momentu Ivo hala’o estudu iha Ensino Sekundariu, nia kuda modo no fa’an fila fali hodi ajuda nia inan aman inklui selu rasik nia eskola.
“Servisu ne’ebé ha’u iha dezde nivel iha Ensinu Sekundariu tanba ha’u halo rasik modo hodi fa’an fila fali, entaun iha momentu ne’ebá ha’u utiliza osan husi negósiu ne’e maka ajuda ha’u-nia pai ho maen hodi selu ha’u-nia eskola rasik iha Ensino Tecnico Vocasional Ainaro” dehan Ivo ba média mudansa iha Bidau Dili, kuarta 08/03/2023.
Ivo Afirma, kada loron nia hetan rendimentu $.20.00 husi sigarru ne’ebé nia fa’an maibé sorte di’ak bele hetan to’o $.80.00 husi rezultadu negósiu ne’e mak Ivo ajuda maun alin uma laran ne’ebé oras ne’e hala’o hela estudu inklui mós responde nesesidade loroloron.
“Ha’u sosa sigarru, L.A slob ida $.22.50, Malboro $.23.00 surya $.22.00, no tabaku Esse maka slob ida $.30.00 bainhira ha’u fa’an fali kada loron ha’u hetan rendimentu menus mak $.20.00 dala ruma ha’u hetan to’o $.80.00” nia esplika
Ivo deklara, Dadaun ne’e inan-aman idade avansadu tanba ne’e Ivo tenke esforsu an hodi hala’o servisu hodi ajuda ninia família no bele responde nia nesesidade uma laran.
“Ita tenke motiva an hodi buka rasik osan sustenta fali família uma laran tanba, agora inan aman menus ona forsa entaun susar ona ba sira atu halo servisu tanba ne’e nu’udar oan mane tenke esforsu an buka osan la’ós dependénsia nafatin ba inan aman,” Ivo hakotu.
Estajiadu : Elizio Noronha
Editór : Orlando Magno
