(Dili) Mudansa – Feto foin sa’e ida ho naran Dircia Laura V.M Tapehen feto Potensial ne’e iha hanoin loke rasik kampu Traballu ba nia an hodi sustenta nia moris maibé iha pasadu Dircia para nia estudu iha Universidade Dili Institutu of Tecnologi (DIT) tanba família kbiit la to’o atu suporta ninia estudu.
Feto bonita ne’e orijen husi munisípiu Vikeke no iha alin feto na’in rua ne’ebé mak iha hanoin nakonu ho espíritu kreativu hodi kria kampu traballu ba nia an rasik no mós fó servisu ba nia maluk joven sira.
Antes ne’e iha tinan 2018 Dircia hala’o hela nia estudu iha Dili Institutu of Tecnologi (DIT) foti departamentu ekonomia la konsege remata nia estudu Tanba kbiit husi família la natoon atu suporta nia estudu tanba ne’e nia foti desizaun cuti/para husi nia estudu kontinua fali halo business hodi sustenta nesesidade loroloron.
Dircia Laura hanesan na’in ba Burger no Boba hato’o nia sentimentu kontente no agradese ba maromak tanba negósiu ki’ik ne’ebé nia halo, ohin loron bele sai Susesu iha nia Business maski la barak maibé bele responde ona ba ninia nesesidade loroloron.
“Ha’u halo negósiu ki’ik ne’e sorte iha duni, parte ida ha’u kontente maibé hanoin fali ba ha’u-nia pasadu triste liu tanba buat ida la iha atu suporta ba ha’u-nia estudu tanba ne’e ha’u la para ha’u-nia estudu maski nune’e ha’u agradese tebes ba maromak, ohin loron ha’u bele hetan netik oituan hodi responde ba ha’u-nia nesesidade loroloron,”Dehan Dircia ba jornalista média mudansa iha Komoro Dili, kuarta 08/03/2023.
Nia afirma, osan ne’ebé mak nia hetan husi negósiu ne’e konsege sosa ona buat barak inklui mós selu ba alin nia eskola, no iha família nia presiza tanba agora nia mak sai fali hanesan xefe família hodi tau matan ba nia Família uma laran rasik
“Osan Ne’ebe mak ha’u hetan husi ha’u-nia negósiu ne’e konsege sosa ha’u-nia karreta ida, motór ida, selu alin nia eskola, no sosa ona rai hodi halo ha’u-nia uma, maibé osan balun ha’u rai (tabungan), tanba família uma laran ha’u mak sai aman hodi tau matan ba alin sira,” nia Afirma
Nia konta, momentu ne’ebá Dircia sei hala’o nia estudu susar loos atu hetan osan iha semester 8 atu ba hakerek proposál maibé ekonomia la to’o entaun nia iha hanoin ida tenke halo business tanba ne’e nia deside cuti ka para tiha hodi halo buat ruma nune’e osan iha kontinua fila fali nia estudu.
Dircia hahú halo negósiu iha fulan outubru tinan 2020 ho montante osan $.250.00 halo negósiu Kiik osan ne’ebé nia iha la’ós ninia rasik maibé hetan ajuda husi parseiru balu, entaun Dircia jere osan $.100.00 nia halo gerobak no restu sosa sasán ne’ebé nia presiza
Feto potensiál ne’e akresenta, momentu ne’ebá hanesan estudante ida osan laiha no inan aman mós la servisu entaun atu husu loos ba se? tanba ne’e ho hanoin kreativu nia tenke halo business hodi ajuda fila fali inan-aman, nu’udar joven labele depende beibeik ba inan aman maibé tenke halo buat ruma.
“Negosiu ne’e Inisiativa mai husi ha’u rasik tanba momentu ne’ebá ha’u-nia amá Fa’an de’it dose iha Ossu bainhira ha’u husu osan atu selu eskola sira hatán osan la iha entaun prontu ha’u deside tenke halo negósiu ida, oinsá mak hetan Osan oituan hodi ajuda fali ha’u-nia inan aman Sira,” katak Dircia
Feto Mestisa ne’e haktuir, rendimentu primeiru fulan ida la’o di’ak no nia rasik hakfodak ho rendimentu fulan ida de’it nia bele hetan to’o $.2.000.00 entaun iha ne’ebá komesa motiva ona ninia vontade oinsá atu kontinua halo negósiu ne’e
Nia esplika meius fa’an Boba, Burger ho es, durante ne’e utiliza liu husi média online hanesan WhatsApp, Facebook, tiktok, no Instagram inklui mós ba halo promosaun iha tempu loron boot.
“Ha’u aprende halo boba ne’e, nonton husi youtube de’it to’o hatene tiha maibé atu halo mak osan laiha,” nia deklara.
Enkuantu Dircia iha hanoin atu ba fali eskola hodi kontinua nia estudu hanesan baibain maibé agora nia sente tempu limitadu tebes tanba okupadu ho ninia atividade negósiu ne’ebé nia hala’o hela.
“Dosente sira mai buka ha’u atu ba kontinua fali eskola iha tempu kalan nian maibé agora ha’u sei sibuk no fokus tiha lai ha’u-nia negósiu ne’e depois mak kontinua fali ha’u-nia estudu,” nia relata.
Durante ne’e Dircia mós fó servisu ba joven na’in lima hodi servisu hamutuk tanba Tuir Planu ba oin atu loke tan fatin iha Tasi Tolu to’o Bidau no iha fatin ne’ebé de’it, la presiza fatin luan maibé importante maka gerobak ida bele hamriik.
Jornalista : Domings Viana
Editór : Orlando Magno
