(Dili) Mudansa – Grupu Unidade Haforsa Asosiasaun Halibur Defisiensia Matan Timor Leste (AHDMTL), halibur Lixu ne’ebé naklekar iha estrada ninin hodi prodús fali ba produtu ne’ebé furak ba ema hotu nia matan no fó inspirasaun ba Timor oan Sira atu banati tuir.
Koordenadór Unidade AHDMTL Tomas Butamali Informa, Lixu hirak ne’ebé komunidade sira soe lekar iha dalan no estrada mak sai hanesan inspiradu hodi fó inspirasaun ba sira nia Ekipa bele hamosu Grupu unidade haforsa AHDMTL.
“Ami Nia kreatividade fó ona kontribuisaun ba ita-nia Estadu tanba ami mós bele fó ona servisu kmaan ba grupu saneamentu sira bainhira ami rekolla lixu sira ne’ebé iha fatin fatin hodi halo fali ba produtu ne’ebé Mak ami halo,” Dehan Koordenador Tomas Ba média Mudansa iha Eis Edifisiu Uniaun Europea Dili, Kuarta 08/03/2023.
Nia parte sente kontente bainhira tempu Feria parte relevante konvida defisiénsia sira partisipa hodi halo promosaun ba sira nia produtu ne’ebé sira rasik prodús.
“Maske ami defisiénsia matan maibé Ami nia kreatividade hanesan ne’e bele ajuda ona Governu no Estadu hodi prevene Ambiente sidade husi Fo’er, no prevene komunidade sira husi moras ka dezastre Naturais, ne’ebé fó impaktu ba ema nia vida,”. Tomas haktuir
Nia afirma, Maske sira husi Grupu Defisiensia Matan maibé esperansa ba futuru lakohi para de’it iha dalan klaran maibé hakarak kontinua ba oin nafatin hodi kontribui ba sidade moos.
“atividade ida ne’e, Ami hahú ho osan montante $.40.00 no Osan sira ne’e mai Grupu Unidade Haforsa AHDMTL, ami hatama kada ema $.1.00 ou $.2.00 depois mak ami jere fali ba sasán ne’ebé ami uza hanesan Alkati, Arame Kabas no buat seluk tan,” nia relata.
Koordenadór Tomas sujere, husu ba maluk Joven sira presiza kria Unidade ba ida-idak nia an no presiza kontribui ba Paz no Estabilidade iha rai laran.
Husu mós ba estadu no Governu, tenke tau importánsia ba Joven sira ne’ebé iha hanoin ka iha kreatividade hodi kontribui ba nasaun nia dezenvolvimentu
“Ami ne’ebé harii grupu kreatividade ne’e bele fó ona servisu ba ami nia an rasik no fó mós servisu ba Joventude sira ne’ebé oras ne’e abandonadu hela, tan ne’e husu ba Governu Timor Leste karik ba futuru mai bele aloka netik Osan ba Grupu kreativu sira hodi kontribui ba ambiente iha sidade,” Tomas rekomenda.
Nia parte husu mós ba komunidade sira labele soe fo’er arbiru no labele dehan buat sira Kiik hanesan ne’e la vale, maski ema dehan la vale maibé husi lixu sira ne’e bele fó kampu servisu ba ema ida-idak
Estajiadu : Zemidonio Martins
Editór : Orlando Magno
