(Dili) Mudansa – Luta ba futuru hakarak haksolok ho susesu, husi foho (munisípiu Manufahi) la moe bainhira halo negósiu hanesan fa’an fore-mungu daan tasak ne’ebé kahur ho susu been iha sidade Dili kapitál Timor-Leste tanba atu hetan buat di’ak presiza esforsu no pasiénsia.
Maski Sidade Dili akumula ema husi munisípiu hotu-hotu inklui RAEOA no mós ema estranjeiru sira mai hela iha ne’e maibé joven mane ne’ebé fa’an bubur ne’e la sente moe tan luta ba moris naruk la’os dependénsia de’it maibé presiza esforsu an hodi atinji metas ne’ebé tau ona iha lista.
Situasaun ne’e realidade akontese ba joven mane ida ho naran Leopoldo de Jesus Verdial ne’ebé iha inisiativa hakarak buka rasik osan hodi responde ba nesesidade hanesan, selu kós, sosa hahán, sosa ropa, no mós haforsa nesesidade família uma laran ho razaun prinsipál lakohi depende beibeik ba inan aman.
“Bainhira ita tuur hein de’it sei la hetan osan, tanba ne’e nu’udar joven ne’ebé mai husi foho ami hamutuk hodi harii grupu ida ho razaun hakarak atu hetan rasik osan hodi ajuda fali família sira iha foho, importante la bele moe halo negósiu saida de’it iha fatin ne’ebé de’it,” dehan Leopoldo ba média Mudansa iha areadores Parlamentu Nasional Dili, segunda 20/03/2023
Nia afirma, sira nia grupu la hetan apoiu husi parte ne’e be de’it tanba grupu ki’ik ne’e hamriik ho osan empresta hamutuk $.50.00 hodi sosa gelas, kanuru, no fore-mungu, ho susubeen.
“Ami iha jerente na’in ida no ami na’in 6 mak ba fa’an produtu ne’e la’o iha Dili laran, husi ami na’in 6 ne’e fore-mungu balde ida ema na’in 2 no mós fore-mungu gelas ida $.0.50 maibé kliente ida ne’ebé sosa to’o gelas 20 entaun ami fó bonus fore-mungu gelas ida,” nia relata
Leopoldo rekomendasaun, nia husu parte relevante atu prepara kondisaun merkadu seguru nune’e sira bele hala’o sira nia negósiu, aleinde ida ne’e Leopoldo mós husu joven sira atu labele moe bainhira halo buat ne’ebé fó benefísiu ba moris naruk maibé labele tuur mak mehi de’it, tanba ida ne’e sei la mosu bainhira laiha asaun.
Estajiadu : Julio da Costa
Editór : Orlando Magno
