(DILI) Mudansa – Comisão Nasional de Eleições (CNE) Eleva koñesimentu hodi garante prosesu eleisaun lei transparente livre no justu ba partisipante formasaun ofisiál supervizaun eleitorál munisípiu Dili hodi garante eleisaun parlamentár la’o susesu.
Komisária CNE Odete Maria Belo informa, liu husi formasaun Ida ne’e atu bele eleva liu tan ofisiál supervizaun sira nia kapasidade husi sira nia Knaar kompeténsia no toma responsabilidade iha sentru votasaun sira.
Tanba Kada tinan lima iha eleisaun CNE sempre halo rekrutamentu ba supervizaun sira atu sai representante CNE iha Sentru votasaun sira ne’ebé maka iha munisípiu no iha teritorio tomak espesialmente iha Dili ninia.
“Objetivu husi formasaun atu eleva ofisial supervizaun sira nia koñesimentu kona-ba lala’ok eleisaun ne’e rasik nune’e ita garante eleisaun agora la’o ho di’ak no susesu, tanba formasaun ne’ebé iha la’os munisípiu Dili de’it maibé kada munisípiu hotu inklui RAEOA,” dehan Komisaria CNE Odete ba jornalista iha salaun Lalini Larigutu CNE Dili, Segunda, 20/03/2023.
Nia afirma, formasaun refere sei hala’o durante loron 3 ba ofisiál supervizaun sira hamutuk 355 ne’ebé estabelese iha Sentru votasaun hamutuk 262 iha munisípiu Dili hodi bele reforsa ofisiál sentru votasaun sira hodi garante eleisaun ne’e sei la’o ho susesu.
Iha sorin seluk, membru ofisiál supervizaun CNE João Maria relata, CNE hanesan órgaun Ida ne’ebé trata asuntu iha eleisaun tanba ne’e antes tama ba eleisaun tenke kumpre mós knaar hodi kapasita supervizaun sira liu husi formasaun Ida ne’e hodi bele garante eleisaun ne’e la’o ho Justu.
“Antes atu tama iha prosesu kampaña eleitorál no iha loron votasaun CNE halo formasaun ba ninia funsionáriu ofisiál supervizaun sira atu nune’e formasaun ne’e hanesan faze ida atu eleva liu tan sira nia koñesimentu hodi garante eleisaun ne’ebé maka la’o transparente justu no livre” nia esplika.
Iha fatin hanesan, formandu Ofisial Supervizaun Melania Auxilia Pereira Lopes akresenta, liu husi formasaun Ida ne’e oinsá atu Hatene papél nu’udar supervizaun hodi hatene regulamentu sira la’o tuir lei no regulamentu sira.
“Ha’u sente kontente tebetebes, tanba liu husi formasaun Ida ne’e, ami ofisiál supervizaun sira bele partisipa iha eleisaun ne’ebé maka atu mai, no formasaun ne’e mós bele aumenta ami nia kapasidade no liuliu iha área supervizaun nia, oinsá ami bele hatene papél nu’udar órgaun superfisiál iha eleisaun mai” nia akumula.
Estajiada : Remigia Locateli
Editór : Orlando Magno
