(Dili) Mudansa – Joanito Vicente Marques hanesan estudante husi Universidade Nasional Timor Lorosa’e (UNTL), iha ne’ebé joven kreativu ne’e inspira nia an hodi fahe tempu loke alfaiate ho fundus $.800.00 maibé kada fulan nia hetan fali osan $.300.00 ba leten hodi resposta ba nesesidade uma laran no selu rasik eskola.
Tanba ne’e tenke uza tempu tuir nia tempu keta husik tempu liu ho silénsiu maibé tenke aproveita tempu iha momentu agora tan idade agora seidauk tarde atu aprende buat barak hodi kontribui ba nasaun Timor-Leste.
Nia akresenta, hanesan juventude ne’ebé mai husi inan aman ho vida agrikultura, nia aprende suku ropa hodi hetan fundus ikus mai loke rasik alfaiate ho naran roman.
“Momentu loke alfaiate ne’e ha’u prepara fundus $.800.00 no osan ne’ebé loke alfaiate ne’e ha’u hetan liu husi ajuda ema suku ropa iha alfaiate hodi hetan fundus no rai hamutuk depois to’o 2019 ha’u loke rasik fali alfaiate, no mós fundus ne’ebé ami hetan kada fulan $.400 no $.300 ba leten no ami nia ekipa iha ne’e hamutuk na’in 8,” Dehan Joanito ba Media Mudansa iha Aimutin Dili, segunda 20/03/2023.
Joanito lakohi lakon minutu ida liu nonook de’it maibé hakarak aproveita tempu bainhira fila husi eskola tanba agora era globalizasaun ema hotu presiza aprende buat balun oinsá atu responde ba nesesidade loroloron no evita dezempregu iha rai laran.
“Maluk sira ita hotu hatene katak ita-nia nasaun Timor Leste menus kampu servisu tanba ne’e lalika halimar ho tempu maibé aproveita tempu ho idade ki’ik hanesan ne’e tenke aprende iha área oioin hodi aplika iha ita-nia nasaun,” nia deklara.
Joanito afirma, nia parte aprende suku ropa iha tinan 2011 bainhira nia akaba estudu iha universidade kontinua hala’o ninia atividade ne’ebé antes ne’e nia halo iha ninia alfaiate.
“Ha’u hakarak atividade suku ropa, razaun ida mós nesesidade uma laran tanba hotu hotu hakarak eskola hakarak aprende ohin loron eskola gratuita la iha entaun tenke aproveita hala’o atividade ida ne’e hodi hetan osan liu husi buat sira ne’e ligadu ho ita-nia esperiénsia hanesan suku ropa,” nia haktuir.
Joanito realsa, tuir planu ne’ebé Joanito iha, hakarak alfaiate Roman sai boot hanesan mós alfaiate sira seluk nian iha rai laran tuir nia kapasidade no esperiénsia ne’ebé nia hetan.
Observasaun jornalista média Mudansa nian iha terenu katak, alfaiate Roman iha ema na’in 8 no mákina suku ropa iha 6 ne’ebé sempre atende kliente sira nia presiza.
Jornalista : Ekipa MD
Editór : Orlando Magno
