(Dili) Mudansa – Ba oan nia di’ak nu’udar inan nunka kolen atu esforsu an tanba realidade hatudu liu ona, iha ne’ebé durante fulan sia nia inan kuidadu oan iha kanotak to’o ita hetan mundu nia naroman nabilan to’o ohin loron sira nafatin kuidadu no preokupa ba oan nia futuru tanba hakarak oan sira susesu.
Domin husi inan aman nunka mihis no namlele ba oan sira tanba inan aman mak mahon ba oan sira nia moris hodi luta hasoru dezafiu oioin tanba hakarak oan susesu iha futuru.
Situasaun ne’ebé tenik ona iha leten akontese ba negosiante Joana Maria idade 70 husi munisípiu Baucau postu administrativu Baucau Vila suku Gariwai, iha ne’ebé lori produtu lokál husi Baukau mai fa’an iha sidade Dili nune’e bele hetan netik osan oituan hodi selu oan sira nia eskola no mós sustenta moris loron loron.
“Fore rai ne’ebé ha’u fa’an lori husi mai Baucau mak fa’an iha ne’e, bainhira fore rai ne’e hotu ha’u tenke ba foti fali fore rai iha Baucau kontinua mai fali iha Dili, osan ne’ebé ha’u hetan husi negósiu ne’e uza ba nesesidade uma laran no mós selu oan nia eskola,”. Dehan negosiante Joana ba Media Mudansa Komoro Dili, kuarta 22/03/2023.
Negosiante Joana afirma, nia fa’an fore rai iha Dili la’os foin ohin maibé kleur ona, no fore rai ne’ebé nia fa’an kada bikan ki’ik/piris ida ho folin $.0.50 no mós kada loron Joana bele hetan rendimentu $.10.00 dala ruma mós la to’o $.10.00 tan loron ohin la hanesan ho loron aban.
“Ha’u fa’an fore rai iha ne’e (Dili) kleur ona dezde uluk kedas até ohin loron dala ruma ami fa’an ema la sosa maibé aat liu tan mak guarda munisipál sira hadau hotu ami nia sasán maski nune’e ami nafatin fa’an iha ne’e tanba fatin ba ami la iha atu fa’an iha merkadu laran,” Inan ferik ne’e realsa.
Joana akresenta, nia fa’an fore rai primeiru iha Baukau maibé fore rai ne’ebé nia fa’an ema la sosa tan ne’e nia deside mai fa’an iha Dili nune’e bele hetan osan uitoan oinsá bele selu oan nia eskola no sosa nesesidade uma laran.
“Loron tomak ha’u tuur de’it iha ne’e, hahú husi dadeer to’o lokraik hodi fa’an fore rai dala ruma ha’u fa’an iha fatin de’it ema la sosa ha’u tenke tutur hodi la’o hale’u Dili laran nune’e ema bele sosa ha’u nia produtu,”. Nia deklara.
Joana ho nia kaben iha oan na’in hitu, hirak ne’e hotu agora eskola iha Dili maibé Joana nia kaben ne’ebé ho idade 80 hein de’it uma hodi haree animál ne’ebé sira hakiak iha uma Baukau tanba ne’e negosiante Joana kontinua fa’an produtu lokál iha Dili.
Estajiada : Isabel de Fatima
Editór : Orlando Magno
