(Dili) Mudansa – Estudante Univrsidade Nasionál Timor Lorosa’e (UNTL), Teresa Joaquina Alves hanesan mós negosiante ida ne’ebé durante ne’e halo negósiu hodi selu rasik ninia eskola husi semester ida to’o livre teoria no ajuda inan aman hodi sustenta nesesidade uma laran.
Teresa halo negósiu ne’e ho razaun lakohi sai ema dependénsia no tane liman beibeik ba inan aman maibé nia hakarak sai ema independente (mandiri) hodi ajuda inan aman no hakmaan hakmaan sira nia todan.
“Ha’u halo negósiu hanesan ne’e hakarak moris rasik lakohi garantia inan aman, rezultadu husi negósiu ne’e bele selu rasik ha’u-nia eskola husi semester ida to’o agora livre teoria no mós uza osan ne’e sustenta ha’u-nia família sira inklui selu rasik uma aluga ne’ebé dadaun ne’e ha’u hela,” dehan Teresa ba Media Mudansa iha resintu UNTL Dili, Quinta, 23/03/2023.
Teresa hahú halo negósiu bainhira nia remata estudu iha banku sekundária, maibé momentu ne’ebá Teresa ajuda de’it ninia maun hodi fa’an sasán kios nian iha Jardin 5 de Maiu Kolmera Dili maibé to’o ikus Teresa sosa rasik sasán hodi fa’an.
“Negosiu ne’e primeiru ha’u ajuda maun ho biin sira fa’an sigarru kafé, no osan ne’ebé maun ho biin sira fó ha’u rai hamutuk ikus mai atu tama ba $1.000.00 dolar ha’u rasik loke fali ha’u-nia negósiu” nia deklara.
Teresa afirma, nia sente kontente bainhira halo negósiu iha Jardim 5 de Maio tanba kada loron nia bele hetan to’o $.200.00 maibé diferente ho agora tanba nia fa’an fali iha resintu UNTL dala ruma kada loron hetan de’it $.25.00.
“Iha negósiu ne’e ha’u fa’an sigarru bee ákua no mós Pop mie inklui dose, osan ne’ebé ha’u hetan husi negósiu kuaze $.2000.00 resin no benefísiu husi negósiu ne’e osan balu balun ha’u uza hodi sosa ninia motór ida no mós balu rai ha’u rai iha banku,” nia deklara.
Teresa halo ninia negósiu kada loron iha resintu UNTL hahú husi tuku 08 dadeer to’o tuku 06 lokraik mak foin fila ba uma hodi deskansa.
Estajiadus : Elizio Noronha/Zemidoniu Martins.
Editór : Orlando Magno
