(Dili) Mudansa – Foin sa’e mane ida ho naran Jakeu de Deus Martins orijen husi munisípiu Ermera daudaun ne’e hela iha merkadu Taibesi kada loron la’o ho objetivu hale’u sidade Dili leba speaker hodi fa’an tamas ai bairru tan nia iha prinsípiu ida katak bainhira hela iha Dili tenke halo buat ida.
Negosiante Jakeu de Deus Martins informa, bainhira husi munisípiu tun mai iha sidade Dili tenke iha mehi hodi halo netik buat ruma hodi sustenta netik ninia nesesidade loroloron ajuda inan aman hodi haree alin sira nia estudu.
“Nudar ema foho oan tenke motiva ita-nia an hodi halo servisu ruma hanesan Fa’an speaker la’o iha Dili laran hodi sustenta ba nesesidade loroloron nian maski hasoru difikuldade barak maibé nafatin hamriik la’o ba oin ida ne’e mak ha’u-nia prinsípiu,” Dehan Jakeu ba Média Mudansa iha Largo Lecidere Dili, Tersa Feira 07/03/2023.
Jakeu hanesan joven ida ne’ebé motiva nia an hodi hili dalan negósiu, Maske naroman loro-matan nia hanas isin kulit kosar suli no mós udan been habokon isin maibé Jakeu nunka rende tan nia nafatin la’o iha sidade Dili tanba nesesidade uma laran obriga lakohi depende ba ema seluk.
“Primeru ha’u mai husi foho atu halo negósiu maibé osan laiha entaun, ha’u dudu gerobak iha merkadu Taibesi hetan osan $.15.00 depois ha’u fa’an handset ha’u sente osan ne’e aumenta tan ha’u fa’an fali speaker boot ho nia presu, $.80.00 no speaker ki’ik $.45.00,” Jakeu akresenta.
Joven mane ne’e konta, durante fulan neen nia laran Jakeu hala’o negósiu sempre hasoru difikuldade barak, maibé nia nafatin iha vontade hodi la’o negósiu ne’e maski ki’ik importante halo buat ruma bainhira hela iha kapitál nasaun Timor-Leste.
“Hau ba fa’an sasán ne’e dala ruma ema sola dala ruma ema la sosa maibé ha’u nafatin iha vontade hodi la’o nune’e bele sustenta ha’u-nia moris no ajuda ha’u-nia maen no pai tanba ha’u mai husi foho ha’u iha mehi katak bainhira ha’u iha dihi tenke servisu hodi ajuda inan aman la’ós husu beibeik ba inan aman,” hakotu
Estajiadu : Julio da Costa/Elizio Noronha
Editór : Orlando Magno
