(Dili) Mudansa – Seminario Menor Nossa Senora de Fatima (SENOFA) Balide realiza misa funebre ba Diretor spiritual Pe. Fransisco Tavares dos Reis iha kapela SENOFA, iha ne’ebé Pe. Fransisco hakotu iis iha tersa, 07/03/2023/ iha Hospital Nacional Guidu Valadares Dili.
Iha misa funebre ne’e, Pe. Graçiano Barros liu husi ninia omilia hatete, tinan lima nulu ona amu Tavares hala’o nia knaar hanesan amu lulik, no istória barak maka nia husik hela ba sarani sira, tanba destinu entaun nia tenke filafali ba iha nia fatin permanente.
“Ita hatene katak amu Tavares ne’e, amu ida ne’ebé maka di’ak tebes, tinan lima nulu ona nia hala’o ninia knaar hanesan amu lulik obediente tebes hodi husik hela memória lubuk ida mai ita atu konta nia istória,” dehan Pe. Graçiano liu husi nia omilia bainhira hala’o misa funebre ba amu Tavares nia mate isin iha kapela SENOFA Balide Dili, tersa 07/03/2023.
Pé. Graçiano konta, nia parte koñese amu Tavares iha tinan 1988 bainhira nia (Pe. Graçiano) sei SMP hela, rona buat barak tebetebes kona-ba amu Tavares tanba nia amu ida ne’ebé maka di’ak tebes no obediente tebes nunka sura nia kolen.
“Amu Tavares nia istória barak tebes hanesan padre tiha iha Suai, muda mai Maliana, to 1999 Husik Maliana se la sala nia mai Motael, depois sae ba Dare sai hanesan formadór, reitór Amu espiritualidade, husik tiha Dare ba Ainaro, husik tiha ida ne’e fila fali moris hanesan dedika nia moris hanesan formadór to ohin nia husik nia iis.”
Pé. Selebrante ne’e argumenta, moris iha mundu sei la permanente, tanba ne’e buat barak ne’ebé sarani sira aprende husi amu Tavares maka dedikasaun, tan ne’e husu ba seminarista sira tenke banati tuir amu Tavares nia dedikasaun ne’ebé nia hatudu ba sarani sira.
“Amu Tavares hamosu liafuan ida de’it, fiar iha Maromak, moris iha Maromak, hahalok Maromak nia, só lolos dada de’it ain hanesan ne’e, idade katuas ona, Tama iha uma katuas Fatumeta, ne’ebé nia dehan ha’u hein tan tinan rua, maibé ohin nia ba ona uma permanente iha Lalehan, tanba ne’e buat ida ne’ebé ita tenke aprende husi nia maka nia dedikasaun durante tinan 50 nia sei moris hanesan Nain lulik,” nia afirma.
Entretantu tuir informasaun ne’ebé média mudansa asesu iha terenu katak, Aban sei kontinua Missa funebre iha Katedral Dili, oras tuku 4:00 loraik ne’ebé prezide husi Amu Bispu arki Diosece Dili depois kontinua kedas serimónia haloot mate isin iha Semiterio Maloa.
Estajiada : Remigia Locatelli
Editór : Orlando Magno
