(Dili) Mudansa – Joven milénia hanoin kreativu liu husi esforsu an buka hatene oinsá atu hetan osan husi lixu no mós Evita fo’er sira iha sidade Dili tanba komunidade balu seidauk iha konsiénsia atu soe fo’er iha nia fatin.
Asuntu ne’e hato’o husi feto kreativu ida ho naran Diana Alexsandra Maia ba média mudansa bainhira tuir feira durante loron 05 ne’ebé organiza husi Autoridade Munisipiu Dili iha eis Kasa Europa Dili, segunda 06/03/2023.
Diana Alexsandra Maia informa, ninia an deside sai Menbru ba grupu Loza Matak Hasatil (LMH), Tamba hakarak aprende iha atividade resiklajen nune’e bele hetan rendimentu husi resiklajen hodi sustenta Moris loroloron no kontribui ba sidade mós no saudavel.
Nia inklina an iha Grupu Hasatil hahú iha tinan 2021, no aprende Kona ba resiklajen oinsá transforma plástiku ba ai-funan no mós transforma botir sai fali kopu inklui transforma lixu ba produtu seluk.
“Hau nia an hakarak sai membru grupu Hasatil ne’e tanba, ema barak mak soe fo’er arbiru de’it, entaun ha’u sente ladún di’ak, mak ha’u mai aprende iha Hasatil, oinsá mak bele hetan osan husi lixu no minimiza lixu iha Dili laran,” Diana esplika.
Nia aprezenta, grupu Hasatil ne’e di’ak tebes tanba eduka fali ema seluk atu la bele soe fo’er arbiru iha fatin públiku, maibé dala barak Diana ho Ekipa halo limpeza Geral iha Fatin-Fatin nune’e sira bele hili fali plástiku no sasán ne’ebé sira presiza atu prodús tuir sira nia kapasidade.
“Ami mai fa’an aproveita promove mós ami nia produtu ne’ebé ami prodús tiha ona, maibé produtu hirak ne’e folin la hanesan, ida levin 0.25 , kopu $.1.50, ai-funan ida $.3.50 vazu ki’ik ne’e ida $.1.00 depende nia kualidade,” nia afirma.
Diana akresenta, Benifisiu ne’ebé nia hetan husi husi grupu Hasatil kona-ba atividade resiklajen maka bele hetan osan no mós bele motiva ema seluk atu halo atividade sira hanesan ne’e.
“Benefisiu ne’ebé ami hetan maka, aprende buat foun husi grupu Loza Matak Hasatil no mós tempu feira hanesan ne’e ami bele hetan osan oituan hodi sustenta ami nia moris loroloron nian, Diana relata.
Nia rekomenda, ba joven sira iha Timor labele gasta tempu ba konflitu maibé tenke sai unidade hodi transforma buat foun ba ida-idak nia an no mós kontribui buat di’ak ba rai Timor.
“Joven sira ne’ebé abandona seidauk hetan servisu ne’e bele mai hamutuk ho ami hodi aprende hamutuk kona ba resiklajen tanba ida ne’e bele mós kria rasik kampu servisu ba ita-nia an, nia salienta.
Estajiadu : Zemidonio Martins
Editór : Orlando Magno
