(Dili) Mudansa – Idade la sai sasukat atu fa’an modo hodi suporta ba estudu no ajuda inan aman tanba moris ema kriatura sempre iha mehi boot atu la’o tuir dalan hodi atinji objetivu ne’ebé ema ida-idak tau ona iha nia lista moris loroloron nian.
Inan aman hanesan mahon ida ba oan sira atu helik husi terus no susar maibé Hakarak atu susesu tenke liu husi dalan prosesu oioin hodi bele realiza mehi iha futuru tanba ne’e keta depende beibeik ba inan aman maibé tenke esforsu an hodi buka osan atu moris labele garantia de’it ba ema nia kosar been.
Situasaun ne’e realidade akontese ba David do Rosario Belo ho idade (14) hanesan hanesan ema negosiante ida ne’ebé sempre tulun inan aman liu husi fa’an no kuda modo iha kantredu tanba David sente nia an hatene ona buka osan entaun lakohi depende beibeik ba inan-aman sira.
David halo negósiu kada loron tempu lokraik nia sempre fa’an iha mini Merkadu Bekora, no modo ne’ebé nia lori mai fa’an sira rasik kuda iha kantadeiru ne’ebé halo husi David nia papa ho mama.
“Maski ha’u-nia idade sei ki’ik maibé ha’u prontu ajuda ha’u-nia papa ho mama fa’an modo ne’ebé sira kuda iha kinta, nune’e bele hetan osan uitoan hodi suporta ha’u-nia estudu, la bele hein de’it osan husi inan aman bainhira ita mós bele ona buka osan,” dehan David ba Media mudansa iha Bekora Dili, 10/03/2023.
Otas nurak ne’e informa, osan ne’ebé nia hetan husi negósiu ne’e uza ba nesesidade eskola no restu fó ba inan aman hodi haforsa sira nia nesesidade uma laran.
“Hau nia mama ho papa la obriga ha’u atu halo Atividade negósiu ha’u rasik iha vontade atu halo atividade ne’e tanba ita hatene ona buka osan tansá tenke garantia beibeik ba inan aman?,” Negosiate David deklara.
David relata, hahú husi agora tenke aprende mós responsabilidade ba nia an tanba futuru oin mai inan aman sei la responsavel ba ita-nia moris bainhira sira husik iis tan ne’e tenke agora presiza aprende buka osan no mós buka matenek.
“Ami kuda tiha modo bainhira modo boot ha’u ba fa’an fali dala ruma ha’u leba modo ne’e la’o tuir dalan no ba fa’an iha merkadu Taibessi,” Nia haktuir
Entretantu, tuir observasaun ne’ebé jornalista observa iha terenu katak, distánsia husi David ninia hela fatin mai fa’an modo iha Mini Markadu Bakora kuaze la’o kilómetru rua ho balun.
Estajiada MD : Remigia Locatelli
Editór : Orlando Magno
