(Dili) Mudansa – Nu’udar joven labele moe ba servisu saida de’it no mós fanu vontade oinsá bele halo buat ki’ik ida hodi hetan buat ruma iha loron tuir mai nune’e moris la bele dependénsia beibeik ba família sira liuliu inan aman.
Martalena Lopes hanesan negosiante fa’an obralan iha merkadu Manleu informa, Bainhira nia iha planu atu fa’an sasán iha fatin públiku la preokupa ba ema seluk nia lian importante servisu ne’ebé nia halo ajuda nesesidade loroloron hodi moris.
“Primeiru ha’u atu mai fa’an iha ne’e fatin la iha, maibé ha’u-nia amá boot moras, entaun ami rua ha’u-nia biin aproveita amá nia fatin hodi fa’an no ami nunka moe ho ami nia Idade ne’ebé Joven, bainhira ita moe atu fa’an maka moris sei la iha valór mai ita-nia an,” dehan negosiante obralan Martalena ba média mudansa iha nia knaar fatin Manleuana Dili, Quinta 09/03/2023.
Martalena relata, Bainhra nia hahú Loke negósiu ho osan montante $.100.00,hodi sosa boneka no ikus mai osan sira ne’ebé iha hodi Loke fila fali ropa obralan no mós osan balu uza ba nesesidade uma laran hodi ajuda inan aman ne’ebé presiza oan nia tulun.
“Fou-foun ami uza osan $.100.00 sosa boneka fa’an hotu hetan fali $.150.00 entaun osan funan sira ne’ebé tama sosa ami nia presiza loroloron no mós ajuda Ama no Apa sira nia presiza,” nia haktuir
Feto Bonita ne’e, hato’o mós mensajen ba joven sira labele moe ho atividade hanesan negosiante, nu’udar foin sa’e ho idade produtivu labele garantia beibeik ba inan aman no mós governu, maibé koko atu kria rasik servisu ruma ba ida-idak nia aban Antes ezije ba governu.
Estajiadu/a : Julio da Costa Soares/Remigia Locatelli
Editór : Orlando Magno
