(Dili) Mudansa – Moris diferente iha mundu ida ne’e tanba balun sei moris hamutuk ho família ne’ebé kompletu maibé balun lakon ona inan ou lakon ona aman inklui lakon mós feton maun alin maibé nafatin prontu simu realidade ne’e hodi kontinua hala’o peregrinasaun iha mundu ida ne’e.
Lakon inan ka lakon aman sente lakon murak mean no mutin no mós ita-nia an sente moris la kompletu ona tanba ita lakon haku’ak no domin husi inan aman ne’ebé halo ita koñese mundu ida ne’e nia nabilan.
Agradese no nafatin hadomi inan aman ne’ebé dadaun ne’e sei hamutuk ho ita, nu’udar joven tenke oferese an hodi ajuda inan aman liu husi halo negósiu fa’an liis no bua iha fatin fatin oinsá hakmaan sira nia esforsu ba ita oan sira.
Situasaun moruk ne’e, prefere ba feto bonita hanesan negosiante ida ho naran Agusta de Araujo orijen husi munisípiu Ermera ne’ebé ajuda nia papa halo negósiu fa’an liis no bua iha merkadu laran hodi suporta ba nia estudu no ba nesesidade uma laran.
“Hau la moe atu ajuda papa fa’an sasán hodi bele selu ha’u-nia kursus no mós hare ba nesesidade uma laran, Maske fa’an de’it Bua ho liis, maibé ha’u esforsu nafatin hodi ajuda papa nune’e alin Sira bele remata iha nivel sekundáriu tanba ami nia uma laran falla ekonomia entaun ha’u la kontinua estudu iha ensinu superiór,” dehan Agusta ba média mudansa iha merkadu Taibesi Dili, kinta 09/03/2023.
Agusta afirma, nia Remata estudu sekundária iha tinan 2021 no Nia labele kontinua tanba ekonomia Uma laran la sufisiente no mós ninia mama hakotu iis ih tinan 2022 hodi ba hela iha fatin permanente maromak nia kadunan santu.
“Bainhira Remata sekundária ha’u labele kontinua iha nivel superiór tanba ekonomia la du’un sufisiente ba atu suporta ami nia estudu,” Agusta deklara.
Nia relata, maski ho ekonomia la sufisiente maibé nia sei esforsu nafatin atu bele ajuda ninia papa no kontinua aprende maski la’ós ih nivel ensinu superiór maibé nia hakarak kontinua fali iha edukasaun naun- formál tuir forsa no kbiit ne’ebé sira iha.
Agusta tenik, nu’udar aman lakohi atu Nia oan hakotu estudu. maski la uza xapeu metan maibé tenke aprende netik buat balun ne’ebé maka bele hadi’a Nia futuru.
“Hau deside mai iha Dili hodi ajuda ha’u-nia papa fa’an Bua no liis maski la barak maibé bele sustenta ekonomia uma laran no ba Hau Nia Alin sira Nia eskola no selu ha’u-nia kursu lian Korea” Agusta akresenta
Nia esplika, Lis no bua ne’ebé Sira fa’an kada loron bele hetan osan $.8.00/10.00 maibé Nia esforsu nafatin hodi ajuda Nia papa faan hodi kompleta nesesidade loroloron tanba Lakohi tane liman ba ema seluk.
Estajiadu : Jeronimo Freitas
Editór : Orlando MAgno
