(Dili) Mudansa – Negosiante Abel Husi munisípiu Viqueque sente triste no lamenta tebes ba asaun ne’ebé Guarda munisipál sira halo ba vendedór(a) ne’ebé fa’an iha Terminal merkadu Taibesi, iha ne’ebé asaun ne’e halo vendedores sira la hakmatek atu fa’an sasán hodi hetan osan.
Abel informa, Dili mak fatin sentru ba ema husi munisípiu hotu hotu tanba ne’e sira mai husi munisípiu atu fa’an produtu balun nune’e bele hetan nein osan uitoan hodi sustenta moris.
“Agora ami atu fa’an iha merkadu Taibesi maibé fatin la iha ba ami atu fa’an sasán tanba ne’e ami mai fa’an de’it iha li’ur, transporte nia para fatin maibé durante semana ida ona ema la sosa ami nia sasán tanba guarda munisipál sira mai duni ami no foti ami nia sasán sira,” dehan Abel ba jornalista iha merkadu Taibesi Dili, Kuarta 29/03/2023.
Iha biban ne’e Negosiante Abel mós hato’o ninia lamentasaun kona-ba kondisaun merkadu Taibesi tanba bee no hariis fatin la iha tanba ne’e nia husu ba governu liuliu parte relevante la bele hatene de’it duni no hadau ema nia sasán maibé presiza prepara kondisaun ba vendedór sira oinsá atu asesu hariis fatin.
Iha fatin Hanesan Vendedor Carlito argumemta, moris iha foho ou munisípiu susar atu hetan osan husi negósiu hanesan produtu lokál sira ne’e tanba ne’e nia deside hakarak halo negósiu iha Dili nune’e bele hetan osan uitoan hodi hatán ba nesesidade uma laran nian.
“Ami fa’an sasán iha terminál ida ne’e la’ós ami nia hakarak maibé situasaun mak obriga tanba ami atu fa’an iha merkadu laran maibé fatin la iha entaun obrigatóriu ami tenke fa’an iha ne’e,” nia hakotu.
Estajiada : Isabel de Fatima
Editór. : Orlando Magno
