(Dili) Mudansa – Hanesan lideransa ba feen ho oan iha uma laran tenke esforsu an hodi responde ba nesesidade uma laran maski liu husi negósiu simples maibé la sura kolen importante maka ahi matan dapur nian labele mate iha loron ho kalan.
Lia hirak ne’e hato’o husi negosiante Duarte Ximenes ba jornalista Madansa iha merkadu Taibesi Dili, tersa 21/03/2023.
“Hanesan aman ba família uma laran, tenke iha responsabilidade ba família keta sura kolen bainhira luta ba moris, se ita la responsabilidade ba moris ida ne’e, se loos mak atu tau matan ba ita-nia moris iha família uma laran,” nia informa”.
Duarte haktuir, liu husi moris ida ne’e tenke simu realidade no responsabilidade, maski todan, maibé nia nunka lakon vontade hodi hasoru moris ida ne’e.
“Maski todan ha’u tenke simu, tanba ida ne’e mak realidade moris no responsavel ba família, ha’u agradese tebes ho moris ida ne’e, tanba liu husi fa’an ai bele responde ona ha’u nia nesesidade uma laran nian,” negosiante Duarte esplika.
Nia relata, ai maran ne’ebé nia fa’an sosa tutan de’it husi ema balu futun lima nia presu $.1.00 maibé Duarte fa’an fali futun ida sentavu 0.25, entaun osan ne’ebé nia hetan husi ninia negósiu ne’e uza ba nesesidade uma laran no mós selu oan sira nia eskola.
“Ha’u fa’an ai maran ne’e Ema sosa, maibé ho sorte de’it, tanba iha ne’e ema barak mak fa’an ai maran la’os ha’u mesak, bainhira sorte di’ak loron ida ha’u bele hetan to’o $.5.00 di’ak ida ami hetan $.3.00 maibé dala ruma ema la sosa liu,” Duarte deklara.
Negosiante ne’e konta, Duare nia kaben (feen) mós halo negósiu, fa’an produtu lokál hanesan, ai-fariña, talas, fehuk, hudi, no mós produtu lokál sira seluk.
Tanba ne’e nia husu ba oan sira labele lakon vontade atu aprende hodi remata imi-nia estudu, tanba nu’udar inan aman la hakarak buat seluk husi oan sira maibé importante maka oan sira tenke susesu ka remata estudu.
“Ami lakohi oan sira atu terus hanesan ami, husik hela terus ne’e mai ami de’it, lalika to’o tan ba imi oan sira tanba ami nia esforsu mak oan sira nia susesu, maibé labele hein de’it oportunidade maibé imi mak tenke luta hodi buka rasik oportunidade,” nia akresenta.
Duarte Ximenes orijen husi aldeia Keorema suku Nunu-Moge postu administrativu Hatubuiliko munisípiu Ainaru, Duarte iha oan na’in neen (6) ne’ebé kompostu husi feto na’in 3 mane na’in 3, husi hirak ne’e, na’in ida kontinua estudu iha Universidade Nasionál Timor Lorosa’e (UNTL), ida iha sekundária Bekora, na’in ida eskola iha EBC Bekora no mós na’in tolu eskola iha EBF Taibesi.
Estajiadu : Zemidonio Martins.
Editór : Orlando Magno
